കണ്ണൊന്ന് ശ്രദ്ധിച്ചാൽ അറിയാം, ഉള്ളിലെ രോഗങ്ങൾ; ശരീരം നൽകുന്ന സൂചനകൾ അവഗണിക്കരുത്

കണ്ണുകൾ കാഴ്ചയുടെ ലോകം തുറന്നുതരുന്ന വെറും ജാലകങ്ങൾ മാത്രമല്ല, നമ്മുടെ ശരീരത്തിന്റെ ഉള്ളറകളിലേക്ക് വെളിച്ചം വീശുന്ന സൂചകങ്ങൾ കൂടിയാണ്. പലപ്പോഴും നിസ്സാരമെന്ന് കരുതി തള്ളിക്കളയുന്ന ചില നേത്രരോഗ ലക്ഷണങ്ങൾ, പ്രമേഹം, കൊളസ്ട്രോൾ, കാൻസർ തുടങ്ങിയ ഗുരുതരമായ ആരോഗ്യപ്രശ്നങ്ങളുടെ ആദ്യ സൂചനകളാകാം. കേന്ദ്ര നാഡീവ്യൂഹവുമായി നേരിട്ട് ബന്ധമുള്ളതുകൊണ്ട് ശരീരത്തിലുണ്ടാകുന്ന ഏത് മാറ്റവും കണ്ണുകളിൽ പ്രതിഫലിക്കാൻ സാധ്യതയുണ്ട്.

“ഫ്രണ്ടിയേഴ്സ് ഇൻ മെഡിസിൻ” പോലുള്ള ശാസ്ത്ര ജേണലുകളിൽ പ്രസിദ്ധീകരിച്ച പഠനങ്ങൾ വ്യക്തമാക്കുന്നത്, പല രോഗങ്ങളും അവയുടെ ലക്ഷണങ്ങൾ പൂർണ്ണമായി പ്രകടമാക്കുന്നതിന് മുൻപ് തന്നെ കണ്ണുകളിലൂടെ സൂചനകൾ നൽകുമെന്നാണ്. റെറ്റിനയിലെ രക്തക്കുഴലുകളിലുണ്ടാകുന്ന മാറ്റങ്ങൾ, നിറവ്യത്യാസങ്ങൾ, അസാധാരണമായ പാടുകൾ എന്നിവയെല്ലാം ഉള്ളിലെ പ്രശ്നങ്ങളിലേക്കാണ് വിരൽ ചൂണ്ടുന്നത്.

കണ്ണുകൾ നൽകുന്ന പ്രധാന സൂചനകൾ

• പ്രമേഹം: രക്തത്തിലെ പഞ്ചസാരയുടെ അളവ് കൂടുന്നത് കണ്ണിലെ ചെറിയ രക്തക്കുഴലുകളെ തകരാറിലാക്കും. ഇത് ‘ഡയബറ്റിക് റെറ്റിനോപ്പതി’ എന്ന അവസ്ഥയിലേക്ക് നയിക്കും. കാഴ്ച മങ്ങുക, നിറങ്ങൾ തിരിച്ചറിയാൻ ബുദ്ധിമുട്ട്, കണ്ണിന്റെ കാഴ്ചാകേന്ദ്രമായ മാക്യുലയിൽ നീർക്കെട്ട് വരിക എന്നിവയെല്ലാം പ്രമേഹത്തിന്റെ ലക്ഷണങ്ങളാണ്. പ്രമേഹരോഗികൾക്ക് ഗ്ലോക്കോമ, തിമിരം എന്നിവ വരാനുള്ള സാധ്യതയും വളരെ കൂടുതലാണ്.
• ഉയർന്ന കൊളസ്ട്രോൾ: ശരീരത്തിൽ ചീത്ത കൊളസ്ട്രോളിന്റെ (LDL) അളവ് കൂടുമ്പോൾ അത് കണ്ണിന്റെ റെറ്റിനയിലേക്കുള്ള രക്തക്കുഴലുകളിൽ അടിഞ്ഞുകൂടി തടസ്സങ്ങൾ സൃഷ്ടിക്കും. ഇത് കാഴ്ചയിൽ പെട്ടെന്നുണ്ടാകുന്ന മങ്ങൽ, കണ്ണിന് മുന്നിൽ ഒരു നിഴൽ പോലെ വന്നുപോകുന്ന അനുഭവം എന്നിവയ്ക്ക് കാരണമാകും. ചിലരിൽ കണ്ണിന് ചുറ്റും മഞ്ഞനിറത്തിലുള്ള കൊഴുപ്പ് അടിഞ്ഞുകൂടാറുണ്ട് (സാന്തെലാസ്മ). കോർണിയക്ക് ചുറ്റും ചാരനിറത്തിലോ വെള്ളനിറത്തിലോ വളയം (ആർക്കസ് സെനിലിസ്) പ്രത്യക്ഷപ്പെടുന്നതും ഉയർന്ന കൊളസ്ട്രോളിന്റെ ലക്ഷണമാകാം.
• തൈറോയ്ഡ്: കണ്ണുകൾ പുറത്തേക്ക് തള്ളിവരുന്നതായി തോന്നുന്നത് തൈറോയ്ഡ് രോഗത്തിന്റെ, പ്രത്യേകിച്ച് ഗ്രേവ്സ് ഡിസീസിന്റെ ഒരു പ്രധാന ലക്ഷണമാണ്. കൺപോളകൾക്ക് വീക്കമുണ്ടാവുക, കണ്ണുകൾ വരണ്ടതാവുക, ഇരട്ട കാഴ്ച എന്നിവയും ഇതിന്റെ ഭാഗമായി കാണാറുണ്ട്. തൈറോയ്ഡ് ഹോർമോണുകളിലെ വ്യതിയാനം കണ്ണിന് ചുറ്റുമുള്ള പേശികളെ ബാധിക്കുന്നതാണ് ഇതിന് കാരണം.
• പക്ഷാഘാതം (സ്ട്രോക്ക്): ഒരു മുന്നറിയിപ്പുമില്ലാതെ ഒരു കണ്ണിന്റെ കാഴ്ച പെട്ടെന്ന് നഷ്ടപ്പെടുന്നത് പക്ഷാഘാതത്തിന്റെ ലക്ഷണമാകാം. തലച്ചോറിലേക്കുള്ള രക്തയോട്ടം തടസ്സപ്പെടുമ്പോൾ അത് കാഴ്ചയെ നിയന്ത്രിക്കുന്ന ഞരമ്പുകളെ ബാധിക്കുന്നതാണ് കാരണം. ഇരട്ടക്കാഴ്ച, കണ്ണുകളുടെ അനിയന്ത്രിതമായ ചലനം എന്നിവയും സൂചനകളാകാം.
• കാൻസർ: റെറ്റിനോബ്ലാസ്റ്റോമ, ഒക്യുലാർ മെലനോമ തുടങ്ങിയ ചിലതരം കാൻസറുകളുടെ ആദ്യ ലക്ഷണങ്ങൾ കണ്ണുകളിലാണ് പ്രകടമാകുന്നത്. കൃഷ്ണമണിയിലെ നിറവ്യത്യാസം, കാഴ്ചയിൽ കറുത്ത പാടുകൾ കാണുക, പ്രകാശത്തിന്റെ മിന്നലാട്ടങ്ങൾ അനുഭവപ്പെടുക എന്നിവയെല്ലാം ലക്ഷണങ്ങളാകാം. വിശദമായ നേത്രപരിശോധനയിലൂടെ ഇവ നേരത്തെ കണ്ടെത്താനാകും.

അതുകൊണ്ട്, കണ്ണുകളിലുണ്ടാകുന്ന അസാധാരണമായ മാറ്റങ്ങളെ നിസ്സാരമായി കാണരുത്. കൃത്യമായ ഇടവേളകളിലുള്ള നേത്ര പരിശോധന കാഴ്ച നിലനിർത്താൻ മാത്രമല്ല, പല ഗുരുതര രോഗങ്ങളും പ്രാരംഭ ഘട്ടത്തിൽ തന്നെ തിരിച്ചറിയാനും സഹായിക്കും.