ന്യൂയോർക്ക്: നിർമ്മിതബുദ്ധിയുടെ (AI) ഉപദേശം തേടി ഭക്ഷണക്രമത്തിൽ മാറ്റം വരുത്തിയ 60-കാരന് ഗുരുതരമായ ആരോഗ്യപ്രശ്നങ്ങൾ. ചാറ്റ്ജിപിടി (ChatGPT) നിർദ്ദേശിച്ച ഡയറ്റ് പ്ലാൻ പിന്തുടർന്നതിനെ തുടർന്നാണ് ഇദ്ദേഹത്തെ ആശുപത്രിയിൽ പ്രവേശിപ്പിച്ചത്.
ഭക്ഷണത്തിൽ നിന്ന് സാധാരണ ഉപ്പ് (സോഡിയം ക്ലോറൈഡ്) ഒഴിവാക്കുന്നതിനുള്ള വഴിയാണ് ഇയാൾ ചാറ്റ്ജിപിടിയോട് ചോദിച്ചത്. ഇതിന് പകരമായി എഐ ചാറ്റ്ബോട്ട് നിർദ്ദേശിച്ചത് സോഡിയം ബ്രോമൈഡ് എന്ന രാസവസ്തുവായിരുന്നു. മുൻപ് ചില മരുന്നുകളിൽ ഉപയോഗിച്ചിരുന്നെങ്കിലും, കൂടിയ അളവിൽ ശരീരത്തിലെത്തിയാൽ വിഷബാധയ്ക്ക് കാരണമാകുന്ന ഒന്നാണിത്. ഈ ഉപദേശം വിശ്വസിച്ച്, ഓൺലൈനായി സോഡിയം ബ്രോമൈഡ് വാങ്ങി മൂന്നു മാസത്തോളം ഇദ്ദേഹം ഭക്ഷണത്തിൽ ഉപയോഗിച്ചു.
ഇതോടെ മതിഭ്രമം, മാനസികാസ്വാസ്ഥ്യം, ഓർമ്മക്കുറവ് തുടങ്ങിയ ഗുരുതരമായ ലക്ഷണങ്ങൾ പ്രകടമായിത്തുടങ്ങി. അയൽവാസികൾ ഭക്ഷണത്തിൽ വിഷം കലർത്തുന്നുവെന്ന് വരെ അദ്ദേഹം സംശയിച്ചു. ആരോഗ്യനില മോശമായതിനെ തുടർന്ന് ആശുപത്രിയിൽ പ്രവേശിപ്പിച്ചപ്പോഴാണ് ‘ബ്രോമിസം’ എന്നറിയപ്പെടുന്ന ബ്രോമൈഡ് വിഷബാധയാണ് രോഗകാരണമെന്ന് ഡോക്ടർമാർ കണ്ടെത്തിയത്.
മൂന്നാഴ്ചയോളം നീണ്ട ചികിത്സയ്ക്ക് ശേഷമാണ് ഇദ്ദേഹം സുഖം പ്രാപിച്ചത്. ആരോഗ്യപരമായ കാര്യങ്ങളിൽ എഐയെ അന്ധമായി ആശ്രയിക്കുന്നതിന്റെ അപകടങ്ങളെക്കുറിച്ച് ഈ സംഭവം മുന്നറിയിപ്പ് നൽകുന്നു. വിദഗ്ദ്ധരുടെ ഉപദേശം തേടാതെ എഐ നൽകുന്ന നിർദ്ദേശങ്ങൾ, പ്രത്യേകിച്ച് ആരോഗ്യകാര്യങ്ങളിൽ, പിന്തുടരുന്നത് അപകടകരമാണെന്ന് വിദഗ്ദ്ധർ ചൂണ്ടിക്കാട്ടുന്നു.