രാജ്യത്തെ പ്രമുഖ സ്വകാര്യ ബാങ്കായ ഐസിഐസിഐ, പുതിയ സേവിംഗ്സ് അക്കൗണ്ടുകൾക്കുള്ള മിനിമം പ്രതിമാസ ശരാശരി ബാലൻസ് (Monthly Average Balance) കുത്തനെ വർദ്ധിപ്പിച്ചു. 2025 ഓഗസ്റ്റ് 1 മുതൽ പ്രാബല്യത്തിൽ വന്ന ഈ മാറ്റം അനുസരിച്ച്, മെട്രോ, നഗര ശാഖകളിൽ പുതിയ അക്കൗണ്ട് തുറക്കുന്നവർ കുറഞ്ഞത് ₹50,000 രൂപ അക്കൗണ്ടിൽ നിലനിർത്തണം. നിലവിൽ ഇത് ₹10,000 രൂപയായിരുന്നു.
ഈ മാറ്റം ഓഗസ്റ്റ് 1-നോ അതിനുശേഷമോ അക്കൗണ്ട് തുറക്കുന്ന പുതിയ ഉപഭോക്താക്കൾക്ക് മാത്രമാണ് ബാധകം. പഴയ ഉപഭോക്താക്കൾക്ക് നിലവിലുള്ള മിനിമം ബാലൻസ് നിബന്ധനകൾ തന്നെ തുടരും. പുതുക്കിയ നിയമപ്രകാരം, അർദ്ധ-നഗര (സെമി-അർബൻ) ശാഖകളിൽ മിനിമം ബാലൻസ് ₹25,000 ആയും ഗ്രാമീണ ശാഖകളിൽ ഇത് ₹10,000 ആയും നിശ്ചയിച്ചിട്ടുണ്ട്.
പിഴയും ഇളവുകളും:
നിശ്ചിത തുക അക്കൗണ്ടിൽ നിലനിർത്താത്തവരിൽ നിന്ന് പിഴ ഈടാക്കും. ആവശ്യമായ തുകയിൽ വരുന്ന കുറവിന്റെ 6 ശതമാനമോ അല്ലെങ്കിൽ ₹500 രൂപയോ, ഏതാണോ കുറവ്, അതാണ് പിഴയായി ഈടാക്കുക. അതേസമയം, സാലറി അക്കൗണ്ടുകൾ, പ്രധാനമന്ത്രി ജൻ ധൻ യോജന പ്രകാരമുള്ള അക്കൗണ്ടുകൾ, ബേസിക് സേവിംഗ്സ് ബാങ്ക് ഡെപ്പോസിറ്റ് അക്കൗണ്ടുകൾ എന്നിവ സീറോ ബാലൻസ് അക്കൗണ്ടുകളായതിനാൽ ഈ നിബന്ധനയിൽ നിന്ന് ഒഴിവാക്കിയിട്ടുണ്ട്.
എസ്ബിഐ പോലുള്ള പൊതുമേഖലാ ബാങ്കുകൾ മിനിമം ബാലൻസ് പിഴകൾ ഒഴിവാക്കുന്ന സാഹചര്യത്തിലാണ് ഐസിഐസിഐ ബാങ്കിന്റെ ഈ സുപ്രധാന നീക്കം.