ഡൽഹി: തെക്കുകിഴക്കൻ ഡൽഹിയിലെ ഭോഗൽ പ്രദേശത്ത്, പാർക്കിംഗുമായി ബന്ധപ്പെട്ട തർക്കത്തെ തുടർന്ന് ബോളിവുഡ് നടി ഹുമ ഖുറേഷിയുടെ ബന്ധുവായ ആസിഫ് ഖുറേഷി കുത്തേറ്റു മരിച്ചു.
വ്യാഴാഴ്ച രാത്രി 10:30-ഓടെയാണ് സംഭവം. ചർച്ച് ലെയ്നിലെ തൻ്റെ വീടിന് മുന്നിൽ സ്കൂട്ടർ പാർക്ക് ചെയ്തത് ആസിഫ് ചോദ്യം ചെയ്തതാണ് തർക്കത്തിന് കാരണമായതെന്ന് പോലീസ് പറയുന്നു. വാക്കുതർക്കം രൂക്ഷമായപ്പോൾ, പ്രതികൾ മൂർച്ചയേറിയ ആയുധം ഉപയോഗിച്ച് ആസിഫിൻ്റെ നെഞ്ചിൽ കുത്തുകയായിരുന്നു. കുത്തേറ്റു നിലത്തുവീണ അദ്ദേഹത്തെ ഉടൻതന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംഭവവുമായി ബന്ധപ്പെട്ട്, അതേ പ്രദേശത്ത് താമസിക്കുന്ന ഉജ്ജ്വൽ (19), ഗൗതം (18) എന്നിവരെ പോലീസ് അറസ്റ്റ് ചെയ്തു. ഹസ്രത്ത് നിസാമുദ്ദീൻ പോലീസ് സ്റ്റേഷനിൽ ഭാരതീയ ന്യായ സംഹിതയിലെ 103(1), 3(5) വകുപ്പുകൾ പ്രകാരം കേസെടുത്തിട്ടുണ്ട്. മൃതദേഹം പോസ്റ്റ്മോർട്ടത്തിനായി അയച്ചു. സംഭവത്തെക്കുറിച്ചും പ്രതികളുടെ പങ്കിനെക്കുറിച്ചും പോലീസ് വിശദമായി അന്വേഷിച്ചുവരികയാണ്.