Delhi: ആധുനിക തൊഴിൽ ലോകത്തെ പുനർനിർവചിക്കാൻ കഴിവുള്ള ജനറേറ്റീവ് ആർട്ടിഫിഷ്യൽ ഇന്റലിജൻസിന്റെ (AI) കടന്നുവരവോടെ, ഏതൊക്കെ ജോലികളാണ് ഏറ്റവും കൂടുതൽ മാറ്റങ്ങൾക്ക് വിധേയമാകാൻ സാധ്യതയെന്ന് വെളിപ്പെടുത്തി മൈക്രോസോഫ്റ്റ്. യുഎസ്സിൽ മൈക്രോസോഫ്റ്റിന്റെ കോപൈലറ്റ് (Copilot) ചാറ്റ്ബോട്ടുമായി നടത്തിയ 2,00,000-ൽ അധികം ആശയവിനിമയങ്ങളെ അടിസ്ഥാനമാക്കി നടത്തിയ പഠനത്തിലാണ് ഈ കണ്ടെത്തലുകൾ.
വിവരങ്ങൾ കൈകാര്യം ചെയ്യുകയും വിശകലനം ചെയ്യുകയും ആശയവിനിമയം നടത്തുകയും ചെയ്യുന്ന ജോലികളെയാകും എഐ പ്രധാനമായും ബാധിക്കുകയെന്ന് പഠനം വ്യക്തമാക്കുന്നു.
പട്ടികയിൽ മുന്നിലുള്ളവർ ആരെല്ലാം?
പട്ടികയിൽ ഒന്നാം സ്ഥാനത്ത് ഇന്റർപ്രെട്ടർമാരും (ദ്വിഭാഷി) വിവർത്തകരുമാണ്. തൊട്ടുപിന്നാലെ ചരിത്രകാരന്മാർ, പാസഞ്ചർ അറ്റൻഡന്റുമാർ, സർവീസ് സെയിൽസ് റെപ്രസന്റേറ്റീവുകൾ എന്നിവരുമുണ്ട്. എഴുത്തുകാർ, കസ്റ്റമർ സർവീസ് എക്സിക്യൂട്ടീവുകൾ, സിഎൻസി ടൂൾ പ്രോഗ്രാമർമാർ, ടെലിഫോൺ ഓപ്പറേറ്റർമാർ എന്നിവരും ഉയർന്ന അപകടസാധ്യതയുള്ള ജോലികളുടെ പട്ടികയിൽ ഇടംപിടിച്ചിട്ടുണ്ട്.
ടിക്കറ്റ് ഏജന്റുമാർ, റേഡിയോ അവതാരകർ, ടെലിമാർക്കറ്റർമാർ, വാർത്താ വിശകലന വിദഗ്ദ്ധർ, പൊളിറ്റിക്കൽ സയന്റിസ്റ്റുകൾ, എഡിറ്റർമാർ, പിആർ പ്രൊഫഷണലുകൾ, ഡാറ്റാ സയന്റിസ്റ്റുകൾ തുടങ്ങിയ തസ്തികകളും പട്ടികയിലുണ്ട്.
എഐ ഏറ്റവും കൂടുതൽ സ്വാധീനിക്കാൻ സാധ്യതയുള്ള 40 ജോലികൾ
| 1 | ദ്വിഭാഷികളും വിവർത്തകരും (Interpreters and Translators) |
| 2 | ചരിത്രകാരന്മാർ (Historians) |
| 3 | സോഷ്യൽ സയൻസ് ഗവേഷണ സഹായികൾ (Social Science Research Assistants) |
| 4 | സോഷ്യോളജിസ്റ്റുകൾ (Sociologists) |
| 5 | പൊളിറ്റിക്കൽ സയന്റിസ്റ്റുകൾ (Political Scientists) |
| 6 | മദ്ധ്യസ്ഥർ, അനുരഞ്ജകർ (Arbitrators, Mediators, and Conciliators) |
| 7 | പബ്ലിക് റിലേഷൻസ് സ്പെഷ്യലിസ്റ്റുകൾ (Public Relations Specialists) |
| 8 | എഡിറ്റർമാർ (Editors) |
| 9 | ക്ലിനിക്കൽ ഡാറ്റാ മാനേജർമാർ (Clinical Data Managers) |
| 10 | റിപ്പോർട്ടർമാരും മാധ്യമപ്രവർത്തകരും (Reporters and Journalists) |
| 11 | സാങ്കേതിക എഴുത്തുകാർ (Technical Writers) |
| 12 | കോപ്പിറൈറ്റർമാർ (Copywriters) |
| 13 | പ്രൂഫ് റീഡർമാരും കോപ്പി മാർക്കർമാരും (Proofreaders and Copy Markers) |
| 14 | കത്തിടപാടുകൾ കൈകാര്യം ചെയ്യുന്ന ക്ലർക്കുമാർ (Correspondence Clerks) |
| 15 | കോർട്ട് റിപ്പോർട്ടർമാർ (Court Reporters) |
| 16 | എഴുത്തുകാർ (Writers and Authors) |
| 17 | പോസ്റ്റ്സെക്കൻഡറി അധ്യാപകർ (കമ്മ്യൂണിക്കേഷൻസ്, ഇംഗ്ലീഷ്, ഹിസ്റ്ററി) |
| 18 | മാനസികാരോഗ്യം, ലഹരിവസ്തുക്കളുടെ ദുരുപയോഗം എന്നീ മേഖലകളിലെ സോഷ്യൽ വർക്കർമാർ |
| 19 | ക്രെഡിറ്റ് കൗൺസിലർമാർ (Credit Counselors) |
| 20 | ടാക്സ് തയ്യാറാക്കുന്നവർ (Tax Preparers) |
| 21 | നിയമ സഹായികളും പാരാലീഗലുകളും (Legal Assistants and Paralegals) |
| 22 | ലീഗൽ സെക്രട്ടറിമാർ (Legal Secretaries) |
| 23 | ടൈറ്റിൽ എക്സാമിനർമാർ, അബ്സ്ട്രാക്ടർമാർ (Title Examiners and Abstractors) |
| 24 | കോമ്പൻസേഷൻ, ബെനഫിറ്റ്, ജോബ് അനാലിസിസ് സ്പെഷ്യലിസ്റ്റുകൾ |
| 25 | മാർക്കറ്റ് റിസർച്ച് അനലിസ്റ്റുകൾ (Market Research Analysts) |
| 26 | മാനേജ്മെന്റ് അനലിസ്റ്റുകൾ (Management Analysts) |
| 27 | ഫണ്ട് ശേഖരിക്കുന്നവർ (Fundraisers) |
| 28 | ഹ്യൂമൻ റിസോഴ്സസ് സ്പെഷ്യലിസ്റ്റുകൾ (Human Resources Specialists) |
| 29 | കസ്റ്റമർ സർവീസ് പ്രതിനിധികൾ (Customer Service Representatives) |
| 30 | സെയിൽസ് പ്രതിനിധികൾ (സേവനങ്ങൾ) |
| 31 | ഇൻഷുറൻസ് അണ്ടർ റൈറ്റർമാർ (Insurance Underwriters) |
| 32 | ക്ലെയിംസ് അഡ്ജസ്റ്റർമാർ, എക്സാമിനർമാർ, ഇൻവെസ്റ്റിഗേറ്റർമാർ |
| 33 | ലോൺ ഓഫീസർമാർ (Loan Officers) |
| 34 | ഫിനാൻഷ്യൽ എക്സാമിനർമാർ (Financial Examiners) |
| 35 | ബജറ്റ് അനലിസ്റ്റുകൾ (Budget Analysts) |
| 36 | പരിശീലന, വികസന സ്പെഷ്യലിസ്റ്റുകൾ (Training and Development Specialists) |
| 37 | കമ്പ്യൂട്ടർ സിസ്റ്റംസ് അനലിസ്റ്റുകൾ (Computer Systems Analysts) |
| 38 | ഡാറ്റാ സയന്റിസ്റ്റുകൾ (Data Scientists) |
| 39 | ഡാറ്റാബേസ് ആർക്കിടെക്റ്റുകൾ (Database Architects) |
| 40 | ട്രാവൽ ഏജന്റുമാർ (Travel Agents) |
എന്തുകൊണ്ട് ഈ ജോലികൾ അപകടത്തിൽ?
കണ്ടന്റ് തയ്യാറാക്കുക, വലിയ അളവിലുള്ള വിവരങ്ങൾ സംഗ്രഹിക്കുക, പതിവ് ചോദ്യങ്ങൾക്ക് മറുപടി നൽകുക തുടങ്ങിയ ആവർത്തന സ്വഭാവമുള്ള ജോലികൾ എഐക്ക് എളുപ്പത്തിൽ ചെയ്യാൻ കഴിയുമെന്നതാണ് ഈ തസ്തികകൾ അപകടത്തിലാകാൻ കാരണം. മൈക്രോസോഫ്റ്റ് കോപൈലറ്റ്, ചാറ്റ്ജിപിടി പോലുള്ള ടൂളുകൾ ഇതിനകം തന്നെ വിവിധ വ്യവസായങ്ങളിൽ ഇത്തരം ജോലികൾ നിർവഹിക്കുന്നുണ്ട്.
എന്നാൽ, ഈ ജോലികൾ പൂർണ്ണമായും ഇല്ലാതാകുമെന്ന് പഠനം പ്രവചിക്കുന്നില്ല. പകരം, എഐയുടെ സ്വാധീനം തൊഴിലിടങ്ങൾ എങ്ങനെ പൊരുത്തപ്പെടുന്നു എന്നതിനെ ആശ്രയിച്ചിരിക്കുമെന്നും റിപ്പോർട്ട് വ്യക്തമാക്കുന്നു. അതിനാൽ, പരിഭ്രാന്തരാകുന്നതിന് പകരം എഐയുമായി ചേർന്ന് പ്രവർത്തിക്കാൻ പഠിക്കുന്നതും കഴിവുകൾ മെച്ചപ്പെടുത്തുന്നതുമാണ് പ്രധാനമെന്ന് വിദഗ്ദ്ധർ ചൂണ്ടിക്കാണിക്കുന്നു.