ലോകത്തെ ഏറ്റവും ജനപ്രിയ വെബ് ബ്രൗസറായ ഗൂഗിൾ ക്രോം ഏറ്റെടുക്കാൻ 3450 കോടി ഡോളറിന്റെ (ഏകദേശം 2.88 ലക്ഷം കോടി രൂപ) വമ്പൻ ഓഫറുമായി ആർട്ടിഫിഷ്യൽ ഇൻ്റലിജൻസ് (AI) സ്റ്റാർട്ടപ്പായ പെർപ്ലെക്സിറ്റി. ഇന്ത്യൻ വംശജനായ അരവിന്ദ് ശ്രീനിവാസ് നേതൃത്വം നൽകുന്ന ഈ എഐ കമ്പനിയുടെ നീക്കം സാങ്കേതിക ലോകത്ത് വലിയ ചർച്ചകൾക്ക് വഴിവെച്ചിരിക്കുകയാണ്.
വെബ് സെർച്ച് രംഗത്ത് ഗൂഗിളിന്റെ കുത്തക തകർക്കാനുള്ള നിയമനടപടികളുടെ ഭാഗമായി, ക്രോം ബ്രൗസർ വിൽക്കാൻ യുഎസ് നീതിന്യായ വകുപ്പ് ഗൂഗിളിനോട് ആവശ്യപ്പെട്ടിരുന്നു. ഈ സാഹചര്യത്തിലാണ് പെർപ്ലെക്സിറ്റി ഈ വമ്പൻ ഓഫറുമായി രംഗത്തെത്തിയത്. പെർപ്ലെക്സിറ്റിയുടെ നിലവിലെ വിപണിമൂല്യത്തിന്റെ ഇരട്ടിയിലധികം വരുന്ന തുകയാണ് ക്രോമിനായി വാഗ്ദാനം ചെയ്തിരിക്കുന്നത്.
ക്രോം ബ്രൗസർ ഏറ്റെടുത്താലും ഉപയോക്താക്കളുടെ ഡിഫോൾട്ട് സെർച്ച് എഞ്ചിൻ ഗൂഗിളായി തന്നെ തുടരുമെന്നും, തങ്ങളുടെ എഐ സെർച്ച് എഞ്ചിനിലേക്ക് ഉപയോക്താക്കളെ നിർബന്ധിച്ച് മാറ്റില്ലെന്നും പെർപ്ലെക്സിറ്റി ഉറപ്പുനൽകുന്നു. കൂടാതെ, ബ്രൗസറിന്റെ ഓപ്പൺ സോഴ്സ് കോഡായ ക്രോമിയം (Chromium) നിലനിർത്തുമെന്നും, വികസന പ്രവർത്തനങ്ങൾക്കായി അടുത്ത രണ്ട് വർഷത്തിനുള്ളിൽ 300 കോടി ഡോളർ നിക്ഷേപിക്കുമെന്നും കമ്പനി പ്രഖ്യാപിച്ചിട്ടുണ്ട്.
ആമസോൺ പോലുള്ള വമ്പൻ കമ്പനികളുടെ നിക്ഷേപമുള്ള പെർപ്ലെക്സിറ്റി, ഈ ഏറ്റെടുക്കലിലൂടെ ലോകത്തിലെ കോടിക്കണക്കിന് ബ്രൗസർ ഉപയോക്താക്കളിലേക്ക് എത്താമെന്നാണ് കണക്കുകൂട്ടുന്നത്. ഇത് അവരുടെ എഐ അധിഷ്ഠിത സെർച്ച് എഞ്ചിന്റെ വളർച്ചയ്ക്ക് വലിയ മുതൽക്കൂട്ടാകും. എന്നാൽ, ഗൂഗിൾ ഇതുവരെ ക്രോം ബ്രൗസർ വിൽപ്പനയ്ക്ക് വെച്ചിട്ടില്ലാത്തതിനാൽ, പെർപ്ലെക്സിറ്റിയുടെ ഈ നീക്കം നിയമനടപടികളുടെ പശ്ചാത്തലത്തിൽ നിർണായകമാകും.