കാസർകോട്: സംസ്ഥാനത്ത് റെക്കോർഡ് ഉയരത്തിലെത്തിയ ശേഷം പച്ചത്തേങ്ങയുടെ വിലയിൽ നേരിയ കുറവ്. ഏതാനും ആഴ്ചകൾക്ക് മുൻപ് കിലോയ്ക്ക് 80 രൂപ കടന്നു കുതിച്ച പച്ചത്തേങ്ങയുടെ വില കാസർകോട്ടെ പൊതുവിപണിയിൽ കിലോക്ക് 57 രൂപയായി കുറഞ്ഞു. ഒറ്റ ദിവസം കൊണ്ട് അഞ്ച് രൂപയുടെ ഇടിവാണ് രേഖപ്പെടുത്തിയത്. കൊപ്രയുടെ വിലയിലും കിലോയ്ക്ക് അഞ്ച് മുതൽ ആറ് രൂപ വരെ കുറവുണ്ടായിട്ടുണ്ട്.
ഓണക്കാലം അടുത്തിരിക്കെ അനുഭവപ്പെട്ട ഈ വിലയിടിവിന് പ്രധാനമായും രണ്ട് കാരണങ്ങളാണുള്ളത്. തമിഴ്നാട്ടിലെ കോയമ്പത്തൂർ, കങ്കായം തുടങ്ങിയ പ്രദേശങ്ങളിൽ നിന്ന് പുതിയതായി തേങ്ങ വിപണിയിലേക്ക് എത്തിയതും, വില ഇനിയും കുറയുമെന്ന ഭയത്തിൽ വ്യാപാരികൾ സംഭരിച്ചുവെച്ച തേങ്ങ വിറ്റഴിക്കാൻ തുടങ്ങിയതുമാണ് വില കുറയാൻ ഇടയാക്കിയത്. സമീപകാലത്ത് തേങ്ങയുടെയും വെളിച്ചെണ്ണയുടെയും വില ക്രമാതീതമായി വർധിച്ചിരുന്നു. വെളിച്ചെണ്ണ ലിറ്ററിന് 450 രൂപയ്ക്ക് മുകളിലും തേങ്ങ കിലോയ്ക്ക് 80 മുതൽ 100 രൂപ വരെയും എത്തിയിരുന്നു.
ഉത്പാദനക്കുറവ് മൂലം 2025-ൽ വെളിച്ചെണ്ണയുടെ വില ഉയർന്നുതന്നെ നിൽക്കുമെന്നാണ് ലോകബാങ്കിന്റെ പ്രവചനം. വിലക്കയറ്റം നിയന്ത്രിക്കുന്നതിന്റെ ഭാഗമായി ഓണക്കാലത്ത് റേഷൻ കാർഡ് ഉടമകൾക്ക് സബ്സിഡി നിരക്കിൽ വെളിച്ചെണ്ണ നൽകുമെന്ന് സർക്കാർ അറിയിച്ചിട്ടുണ്ട്. നിലവിലെ വിലയിടിവ് താൽക്കാലികമാണെന്നും വ്യാപാരികൾ സൂചിപ്പിക്കുന്നു.