ഇരുമ്പയിരിന് പേരുകേട്ട മധ്യപ്രദേശിലെ ജബൽപൂരിൽ വൻ സ്വർണ്ണ നിക്ഷേപം കണ്ടെത്തി. ജിയോളജിക്കൽ സർവേ ഓഫ് ഇന്ത്യ (GSI) നടത്തിയ വിശദമായ സർവേയിലാണ് ഈ സുപ്രധാന കണ്ടെത്തൽ. സിഹോറ താലൂക്കിലെ മഹഗവാൻ കിയോലാരി മേഖലയിലാണ് സ്വർണ്ണത്തിൻ്റെയും മറ്റ് വിലയേറിയ ലോഹങ്ങളുടെയും സാന്നിധ്യം സ്ഥിരീകരിച്ചിരിക്കുന്നത്. ഈ കണ്ടെത്തൽ പ്രദേശത്തിൻ്റെ സാമ്പത്തിക ഭൂപടം തന്നെ മാറ്റിമറിക്കാൻ ശേഷിയുള്ളതാണ്.
വർഷങ്ങൾ നീണ്ട പരിശ്രമങ്ങൾക്കൊടുവിലാണ് ജിഎസ്ഐ സംഘം ഈ നിഗമനത്തിലെത്തിയത്. പ്രദേശത്ത് നിന്ന് ശേഖരിച്ച സാമ്പിളുകൾ രാസപരിശോധനയ്ക്ക് വിധേയമാക്കിയപ്പോൾ സ്വർണ്ണം, ചെമ്പ് തുടങ്ങിയ വിലയേറിയ ധാതുക്കളുടെ സാന്നിധ്യം വ്യക്തമായതായി ഉദ്യോഗസ്ഥർ അറിയിച്ചു. പ്രാഥമിക വിവരങ്ങൾ അനുസരിച്ച്, ഏകദേശം 100 ഹെക്ടർ സ്ഥലത്ത് ഈ നിക്ഷേപം വ്യാപിച്ചുകിടക്കുന്നു. ലക്ഷക്കണക്കിന് ടൺ സ്വർണ്ണം ഇവിടെ ഉണ്ടാകാമെന്നാണ് വിദഗ്ദ്ധരുടെ അനുമാനം.
ഈ കണ്ടെത്തൽ പൂർണ്ണമായി സ്ഥിരീകരിച്ചാൽ, ഇന്ത്യയിലെ ഏറ്റവും പ്രധാനപ്പെട്ട ധാതു സമ്പന്നമായ മേഖലകളിലൊന്നായി ജബൽപൂർ മാറും. സമീപ ജില്ലയായ കട്നിയിൽ മുൻപ് സ്വർണ്ണ നിക്ഷേപം കണ്ടെത്തിയിരുന്നെങ്കിലും, ജബൽപൂരിലെ ഈ പുതിയ കണ്ടെത്തൽ സംസ്ഥാനത്തിൻ്റെ ഖനന ചരിത്രത്തിൽ ഒരു പുതിയ അധ്യായം തുറക്കുമെന്ന് ഉറപ്പാണ്.