യാത്രകൾക്ക് പുതിയ മാനം നൽകിക്കൊണ്ട് യൂബർ ഇന്ത്യയിൽ ആഡംബര മോട്ടോർഹോം സർവീസ് ആരംഭിച്ചു. പരീക്ഷണാടിസ്ഥാനത്തിൽ ഡൽഹി-എൻസിആറിലാണ് ഈ പുതിയ സേവനം അവതരിപ്പിച്ചത്. കുടുംബാംഗങ്ങളോടൊപ്പമോ സുഹൃത്തുക്കളോടൊപ്പമോ യാത്ര ചെയ്യുമ്പോൾ വീടുപോലുള്ള സൗകര്യങ്ങൾ ആഗ്രഹിക്കുന്നവർക്ക് വേണ്ടിയാണിത്.
സഞ്ചരിക്കുന്ന ഹോട്ടൽ
ഒരു സഞ്ചരിക്കുന്ന ആഡംബര ഹോട്ടലിന് സമാനമായ സൗകര്യങ്ങളാണ് ഈ മോട്ടോർഹോമിൽ യൂബർ ഒരുക്കിയിരിക്കുന്നത്. നാലോ അഞ്ചോ പേർക്ക് സുഖമായി യാത്ര ചെയ്യാവുന്ന വാഹനത്തിൽ സ്വീകരണമുറി, കിടപ്പുമുറി, കുളിമുറി, മൈക്രോവേവ്, മിനി ഫ്രിഡ്ജ്, മടക്കാവുന്ന കിടക്ക, സോഫകൾ എന്നിവയെല്ലാമുണ്ട്.
യാത്രക്കാർക്ക് കൂടുതൽ സൗകര്യങ്ങൾ നൽകുന്നതിനായി പരിശീലനം ലഭിച്ച ഡ്രൈവറും ഒരു സഹായിയും വാഹനത്തിൽ ഉണ്ടാകും. കൂടാതെ, യാത്രയുടെ ഓരോ നിമിഷവും നിരീക്ഷിക്കാൻ തത്സമയ ട്രാക്കിംഗ് സൗകര്യവും, അടിയന്തര സാഹചര്യങ്ങളിൽ സഹായത്തിനായി 24×7 ഹെൽപ്പ്ലൈൻ പിന്തുണയും യൂബർ വാഗ്ദാനം ചെയ്യുന്നു.
ബുക്കിംഗ് എങ്ങനെ?
ഈ സേവനത്തിനുള്ള ബുക്കിംഗ് ഓഗസ്റ്റ് 4 മുതൽ ആരംഭിച്ചു. ഓഗസ്റ്റ് 7 മുതൽ സെപ്റ്റംബർ 6 വരെയാണ് സർവീസ് ലഭ്യമാകുക. യൂബർ ആപ്പിലെ പ്രത്യേക ഐക്കൺ വഴി മോട്ടോർഹോം ബുക്ക് ചെയ്യാം.