പ്രേക്ഷകരുടെ കാത്തിരിപ്പിന് വിരാമമിട്ട് ബിഗ് ബോസ് മലയാളം സീസൺ 7-ന് തുടക്കമായി. സൂപ്പർസ്റ്റാർ മോഹൻലാൽ ഏഴാം തവണയും അവതാരകനായി എത്തിയ ഷോയുടെ ഗ്രാൻഡ് പ്രീമിയർ ചെന്നൈയിൽ പുതുതായി നിർമ്മിച്ച ബിഗ് ബോസ് ഹൗസിൽ വെച്ചാണ് നടന്നത്.
ആവേശകരമായ പ്രകടനങ്ങളോടെ ആരംഭിച്ച ലോഞ്ച് എപ്പിസോഡിൽ ഈ സീസണിലെ മത്സരാർത്ഥികളെ മോഹൻലാൽ ഓരോരുത്തരായി വേദിയിലേക്ക് സ്വാഗതം ചെയ്തു.
എഴുത്തുകാരനും കർഷകനുമായ അനീഷ് തറയിൽ, നടി അനുമോൾ, നടനും മോഡലുമായ ആര്യൻ കഠൂരിയ, ഗായകൻ അക്ബർ ഖാൻ, കലാഭവൻ സരിഗ, ആർജെ ബിൻസി, ഫുഡ് വ്ലോഗറായ ഉനൈസ് സാബു എന്നിവരുൾപ്പെടെയുള്ളവരാണ് ആദ്യ ഘട്ടത്തിൽ ബിഗ് ബോസ് വീട്ടിലേക്ക് പ്രവേശിച്ചത്.
ഇവർക്ക് പുറമെ ഡോക്ടറും നടിയുമായ ബിന്നി നൂബിൻ, എൽജിബിടിക്യു പ്രവർത്തകരായ ആദിലയും നൂറയും, നടൻ അപ്പാനി ശരത്, സോഷ്യൽ മീഡിയ ഇൻഫ്ലുവൻസർമാരായ റിന ഫാത്തിമ, രേണു സുധി തുടങ്ങി 19 മത്സരാർത്ഥികളാണ് ഈ സീസണിൽ മാറ്റുരയ്ക്കുന്നത്.