മോഹൻലാൽ അവതാരകനായി എത്തുന്ന ബിഗ് ബോസ് മലയാളം സീസൺ 7-ന് ഇനി വെറും രണ്ട് നാൾ മാത്രം ബാക്കി. ഓഗസ്റ്റ് 3, ഞായറാഴ്ച വൈകുന്നേരം 7 മണിക്ക് ആരംഭിക്കുന്ന പുതിയ സീസൺ നിരവധി പുതുമകളുമായാണ് എത്തുന്നത്. “ഏഴിന്റെ പണി” എന്ന ടാഗ് ലൈനോടെ എത്തുന്ന ഈ സീസൺ പ്രേക്ഷകരുടെ അഭിപ്രായങ്ങൾക്കും തന്ത്രപരമായ കളികൾക്കും കൂടുതൽ പ്രാധാന്യം നൽകുമെന്നാണ് സൂചന.
ഈ സീസണിന്റെ ഏറ്റവും വലിയ പ്രത്യേകതകളിലൊന്ന് ബിഗ് ബോസിന് മാത്രമായി നിർമ്മിച്ച പുതിയ വീടാണ്. മുൻ സീസണുകളിൽ മറ്റ് ഭാഷകളിലെ ബിഗ് ബോസ് ഹൗസുകൾ പുനർരൂപകൽപ്പന ചെയ്താണ് ഉപയോഗിച്ചിരുന്നത്. എന്നാൽ ഇത്തവണ വിശാലമായ പുൽത്തകിടി, വലിയ ഡൈനിംഗ് ഹാൾ, ആധുനിക സൗകര്യങ്ങളുള്ള അടുക്കള, ആഡംബരപൂർണ്ണമായ ലിവിംഗ് റൂം, നിഗൂഢമായ കൺഫെഷൻ റൂം എന്നിവയെല്ലാം ഉൾക്കൊള്ളുന്ന ഒരു പുതിയ വീടാണ് മത്സരാർത്ഥികൾക്കായി ഒരുക്കിയിരിക്കുന്നത്.
മുൻപില്ലാത്തവിധം കഠിനമായ ടാസ്ക്കുകളും അപ്രതീക്ഷിതമായ നീക്കങ്ങളും ഈ സീസണിന്റെ പ്രത്യേകതയായിരിക്കുമെന്ന് അണിയറ പ്രവർത്തകർ പറയുന്നു. “നാടകങ്ങൾ അവസാനിപ്പിക്കാൻ” താൻ എത്തുന്നുവെന്ന് മോഹൻലാൽ പുതിയ പ്രൊമോയിൽ പറയുന്നതും ഈ മാറ്റങ്ങളുടെ സൂചനയാണ്.
തിങ്കൾ മുതൽ വെള്ളി വരെ രാത്രി 9:30-നും ശനി, ഞായർ ദിവസങ്ങളിൽ രാത്രി 9 മണിക്കുമാണ് ബിഗ് ബോസ് സംപ്രേഷണം ചെയ്യുക. കൂടാതെ ജിയോ ഹോട്ട്സ്റ്റാറിൽ 24 മണിക്കൂറും ഷോ കാണാൻ സാധിക്കും.
ആരൊക്കെയാകും ഇത്തവണ ബിഗ് ബോസ് വീട്ടിലേക്ക് എത്തുക എന്നറിയാനുള്ള ആകാംക്ഷയിലാണ് പ്രേക്ഷകർ.