ന്യൂഡൽഹി: ഇന്ത്യയിലെ വിവിധ വ്യവസായ മേഖലകളിൽ അടുത്ത സാമ്പത്തിക വർഷം (2025-26) ജീവനക്കാർക്ക് മികച്ച ശമ്പള വർദ്ധനവിന് സാധ്യതയെന്ന് പുതിയ റിപ്പോർട്ട്. രാജ്യത്തെ ശരാശരി ശമ്പള വർദ്ധനവ് 6.2 ശതമാനം മുതൽ 11.3 ശതമാനം വരെയായിരിക്കുമെന്നാണ് പ്രവചനം. ഇത് രാജ്യത്തെ സാമ്പത്തിക വളർച്ചയുടെയും തൊഴിൽ വിപണിയിലെ ഉണർവിന്റെയും സൂചനയായി വിലയിരുത്തപ്പെടുന്നു.
ഇലക്ട്രിക് വാഹനങ്ങൾ (EV), റീട്ടെയിൽ, ഇ-കൊമേഴ്സ്, പുനരുപയോഗ ഊർജ്ജം തുടങ്ങിയ അതിവേഗം വളരുന്ന മേഖലകളിലായിരിക്കും ഏറ്റവും ഉയർന്ന ശമ്പള വർദ്ധനവ് രേഖപ്പെടുത്തുക. ഈ മേഖലകളിൽ 11.3 ശതമാനം വരെ വർദ്ധനവ് പ്രതീക്ഷിക്കാമെന്ന് റിപ്പോർട്ടിൽ പറയുന്നു. അതേസമയം, പരമ്പരാഗത നിർമ്മാണ, സേവന മേഖലകളിൽ വർദ്ധനവ് 6.2 ശതമാനത്തിൽ ഒതുങ്ങിയേക്കാം.
രാജ്യത്തിന്റെ ശക്തമായ സാമ്പത്തിക വളർച്ച, വൈദഗ്ധ്യമുള്ള തൊഴിലാളികൾക്കായുള്ള വർധിച്ചുവരുന്ന ആവശ്യം, മികച്ച ജീവനക്കാരെ സ്ഥാപനത്തിൽ നിലനിർത്താനുള്ള കമ്പനികളുടെ ശ്രമം എന്നിവയാണ് ശമ്പള വർദ്ധനവിന് പ്രധാന കാരണങ്ങളായി ചൂണ്ടിക്കാണിക്കപ്പെടുന്നത്. കഴിഞ്ഞ സാമ്പത്തിക വർഷത്തെ അപേക്ഷിച്ച് മികച്ച വർധനവാണ് ഇത്തവണ പ്രതീക്ഷിക്കുന്നത്. 2024-25 വർഷത്തിൽ ശരാശരി 9.2 ശതമാനം വർദ്ധനവാണ് രേഖപ്പെടുത്തിയിരുന്നത്.