സംസ്ഥാനത്തെ പ്ലസ് വൺ, പ്ലസ് ടു വിദ്യാർത്ഥിനികൾക്ക് കാൻസർ പ്രതിരോധ വാക്സിൻ നൽകാനൊരുങ്ങി കേരള സർക്കാർ. ഗർഭാശയഗള കാൻസറിനെതിരെ ഹ്യൂമൻ പാപ്പിലോമ വൈറസ് (HPV) വാക്സിനേഷൻ ആരംഭിക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. സ്ത്രീകളെ ഏറ്റവും കൂടുതൽ ബാധിക്കുന്ന അർബുദങ്ങളിലൊന്നാണിത്. ഒരാഴ്ചയ്ക്കുള്ളിൽ സാങ്കേതിക സമിതി യോഗം ചേർന്ന് വാക്സിനേഷൻ സംബന്ധിച്ച് അന്തിമ തീരുമാനമെടുക്കും .
പദ്ധതിയുടെ പ്രാധാന്യം
ഗർഭാശയഗള കാൻസർ തടയാൻ എച്ച്പിവി വാക്സിൻ ഫലപ്രദമാണെന്ന് കണ്ടെത്തിയിട്ടുണ്ട്. 9 മുതൽ 14 വയസ്സുവരെയുള്ള കുട്ടികളിലാണ് ഈ വാക്സിൻ ഏറ്റവും ഫലപ്രദമെങ്കിലും, 26 വയസ്സുവരെയുള്ളവർക്കും ഇത് നൽകാവുന്നതാണ് . മുഖ്യമന്ത്രിയുടെ നിർദേശപ്രകാരമാണ് ‘ഗർഭാശയഗള കാൻസർ മുക്ത കേരളം’ എന്ന ലക്ഷ്യം കൈവരിക്കാൻ സംസ്ഥാനം ഈ സുപ്രധാന തീരുമാനമെടുത്തതെന്ന് മന്ത്രി വ്യക്തമാക്കി .
ബോധവൽക്കരണവും പ്രതിരോധ പ്രവർത്തനങ്ങളും
എച്ച്പിവി വാക്സിനേഷനെക്കുറിച്ചും ഗർഭാശയഗള കാൻസറിനെക്കുറിച്ചും അവബോധം സൃഷ്ടിക്കുന്നതിനായി ആരോഗ്യ വകുപ്പ് വിപുലമായ ക്യാമ്പയിനുകൾ സംഘടിപ്പിക്കും. പ്ലസ് വൺ, പ്ലസ് ടു വിദ്യാർത്ഥിനികളെ ലക്ഷ്യമിടുന്നതിനാൽ സ്കൂൾ തലത്തിൽ പ്രത്യേക ബോധവൽക്കരണം നൽകും. രക്ഷകർത്താക്കൾക്കും ഇതേക്കുറിച്ച് വിവരങ്ങൾ നൽകും .
കാൻസർ പ്രതിരോധത്തിനായി ‘ആരോഗ്യം ആനന്ദം അകറ്റാം അർബുദം’ എന്ന ജനകീയ കാൻസർ പ്രതിരോധ ക്യാമ്പയിൻ ഇതിനോടകം ആരംഭിച്ചിട്ടുണ്ട്. ഇതിന്റെ ഭാഗമായി 17 ലക്ഷത്തിലധികം ആളുകൾ സ്ക്രീനിംഗ് പരിശോധനകൾക്ക് വിധേയരായി . കാൻസർ കെയർ ഗ്രിഡ് രൂപീകരിച്ച് രോഗനിർണയവും ചികിത്സയും ഏകോപിപ്പിക്കാനും സർക്കാർ നടപടികൾ സ്വീകരിച്ചിട്ടുണ്ട്