മറ്റുള്ളവരുടെ ശ്രദ്ധ പിടിച്ചുപറ്റാൻ ശ്രമിക്കാറുണ്ടോ? ഈ സ്വഭാവം നിങ്ങളിലുണ്ടോയെന്ന് തിരിച്ചറിയാം

മറ്റുള്ളവരാൽ ശ്രദ്ധിക്കപ്പെടാനും അംഗീകരിക്കപ്പെടാനും ആഗ്രഹിക്കുന്നത് മനുഷ്യസഹജമാണ്. എന്നാൽ ഈ ആഗ്രഹം അതിരുവിട്ട്, മറ്റുള്ളവരുടെ ശ്രദ്ധ നേടുക എന്നത് മാത്രം ജീവിതത്തിന്റെ കേന്ദ്രബിന്ദുവായി മാറുമ്പോഴാണ് അത് ‘അറ്റെൻഷൻ സീക്കിങ് ബിഹേവിയർ’ എന്ന അവസ്ഥയിലേക്ക് എത്തുന്നത്. കുട്ടികളിലും മുതിർന്നവരിലും ഒരുപോലെ കണ്ടുവരുന്ന ഈ സ്വഭാവ വൈകല്യം പലപ്പോഴും വ്യക്തിബന്ധങ്ങളെയും തൊഴിൽ ജീവിതത്തെയും പ്രതികൂലമായി ബാധിക്കാറുണ്ട്.

എന്തുകൊണ്ട് ഈ സ്വഭാവം ഉണ്ടാകുന്നു?

ഈ സ്വഭാവത്തിന് പിന്നിൽ പല കാരണങ്ങളുണ്ടാകാം. പ്രധാനമായും ഇവയാണ്:

• കുട്ടിക്കാലത്തെ അവഗണന: ചെറുപ്പത്തിൽ മാതാപിതാക്കളിൽ നിന്നോ വേണ്ടപ്പെട്ടവരിൽ നിന്നോ ആവശ്യത്തിന് സ്നേഹമോ പരിഗണനയോ അംഗീകാരമോ ലഭിക്കാതെ വരുന്നത്.
• ആത്മവിശ്വാസക്കുറവ്: സ്വന്തം കഴിവുകളിലും മൂല്യത്തിലും വിശ്വാസമില്ലാതിരിക്കുക. മറ്റുള്ളവർ അംഗീകരിക്കുമ്പോൾ മാത്രം തനിക്ക് വിലയുണ്ടെന്ന് ചിന്തിക്കുക.
• അരക്ഷിതാവസ്ഥ: ബന്ധങ്ങളിൽ എപ്പോഴും ഒരുതരം അരക്ഷിതാവസ്ഥ അനുഭവപ്പെടുക.
• വ്യക്തിത്വ വൈകല്യങ്ങൾ: ബോർഡർലൈൻ പേഴ്സണാലിറ്റി ഡിസോർഡർ, ഹിസ്ട്രിയോണിക് പേഴ്സണാലിറ്റി ഡിസോർഡർ പോലുള്ള മാനസികാരോഗ്യ പ്രശ്നങ്ങളുടെ ഭാഗമായും ഈ സ്വഭാവം കാണാറുണ്ട്.

ലക്ഷണങ്ങൾ എങ്ങനെ തിരിച്ചറിയാം?

കുട്ടികളിൽ:

• അനാവശ്യമായി വാശിപിടിച്ച് കരയുകയും ബഹളം വെക്കുകയും ചെയ്യുക.
• മറ്റുള്ളവർ സംസാരിക്കുന്നതിനിടയിൽ കയറി സംസാരിച്ച് ശ്രദ്ധ നേടാൻ ശ്രമിക്കുക.
• ഇല്ലാത്ത കാര്യങ്ങൾ പറഞ്ഞ് സഹതാപം നേടാൻ നോക്കുക.
• അസുഖമുണ്ടെന്ന് അഭിനയിക്കുക.

മുതിർന്നവരിൽ:

• ചെറിയ കാര്യങ്ങളെയും പെരുപ്പിച്ച് നാടകീയമായി അവതരിപ്പിക്കുക.
• സഹതാപം നേടാനായി കള്ളങ്ങൾ പറയുകയോ നടന്ന സംഭവങ്ങളെ വളച്ചൊടിക്കുകയോ ചെയ്യുക.
• സംസാരത്തിൽ എപ്പോഴും താൻ മറ്റുള്ളവരേക്കാൾ കേമനാണെന്ന് സ്ഥാപിക്കാൻ ശ്രമിക്കുക.
• സോഷ്യൽ മീഡിയയിൽ അമിതമായി പോസ്റ്റ് ചെയ്യുകയും ലൈക്കുകൾക്കും കമന്റുകൾക്കുമായി നിരന്തരം കാത്തിരിക്കുകയും ചെയ്യുക.
• പുറമേയ്ക്ക് വളരെ ആത്മവിശ്വാസമുള്ളവരായി കാണപ്പെടുമെങ്കിലും, ഉള്ളിൽ ആഴത്തിലുള്ള അപകർഷതാബോധം കൊണ്ടുനടക്കുക.

എങ്ങനെ പരിഹരിക്കാം?

കുട്ടികളുടെ കാര്യത്തിൽ:
കുട്ടികളിലെ ഈ സ്വഭാവം മാറ്റിയെടുക്കുന്നതിൽ മാതാപിതാക്കൾക്ക് വലിയ പങ്കുവഹിക്കാനാകും. അവർ നല്ല കാര്യങ്ങൾ ചെയ്യുമ്പോൾ ശ്രദ്ധിക്കുകയും അഭിനന്ദിക്കുകയും ചെയ്യുക. എന്നാൽ അനാവശ്യ വാശികൾക്കും ബഹളങ്ങൾക്കും വഴങ്ങിക്കൊടുക്കാതിരിക്കുക. അത്തരം സാഹചര്യങ്ങളിൽ ശ്രദ്ധ കൊടുക്കാതിരുന്നാൽ പതിയെ ആ സ്വഭാവത്തിൽ മാറ്റം വരും. കുട്ടികളുടെ ആവശ്യങ്ങൾ നല്ലരീതിയിൽ സംസാരിച്ച് അവതരിപ്പിക്കുമ്പോൾ മാത്രം സാധിച്ചുകൊടുക്കുക.

മുതിർന്നവരിൽ:
മുതിർന്ന ഒരാളിൽ ഈ സ്വഭാവം മാറ്റിയെടുക്കാൻ സ്വയം തിരിച്ചറിവ് അത്യാവശ്യമാണ്.

• മറ്റുള്ളവരുടെ അംഗീകാരത്തിന് വേണ്ടി കാത്തുനിൽക്കാതെ സ്വന്തം കഴിവുകളെയും നന്മകളെയും സ്വയം അംഗീകരിക്കാൻ പഠിക്കുക.
• ആത്മവിശ്വാസം വർധിപ്പിക്കാനുള്ള കാര്യങ്ങളിൽ ശ്രദ്ധ കേന്ദ്രീകരിക്കുക.
• കഴിഞ്ഞുപോയ കാലത്തെ മോശം അനുഭവങ്ങളുടെ പേരിലാവാം ഈ സ്വഭാവം രൂപപ്പെട്ടതെന്ന് മനസ്സിലാക്കുകയും അതിൽ സ്വയം കുറ്റപ്പെടുത്താതിരിക്കുകയും ചെയ്യുക.
• സത്യസന്ധമായി സംസാരിക്കാനും മറ്റുള്ളവരെ ക്ഷമയോടെ കേൾക്കാനും പരിശീലിക്കുക.
• ഈ സ്വഭാവം നിയന്ത്രിക്കാൻ ബുദ്ധിമുട്ടാണെന്ന് തോന്നിയാൽ ഒരു ക്ലിനിക്കൽ സൈക്കോളജിസ്റ്റിന്റെ സഹായം തേടാവുന്നതാണ്.