ജോലിയിൽ ഒരു മാറ്റം ആഗ്രഹിക്കാത്തവരായി ആരുമുണ്ടാകില്ല. മികച്ച കരിയർ, ഉയർന്ന പദവി, സംരംഭകനാകാനുള്ള മോഹം എന്നിങ്ങനെ സ്വപ്നങ്ങൾ പലതാണ്. എന്നാൽ എവിടെ തുടങ്ങണം, എങ്ങനെ മുന്നോട്ട് പോകണം എന്നറിയാതെ പകച്ചുനിൽക്കുകയാണോ? എങ്കിൽ വഴികാട്ടിയാകാൻ ഇതാ ചില മികച്ച പുസ്തകങ്ങൾ. പ്രചോദനം നൽകാനും പുതിയ ആശയങ്ങൾ കണ്ടെത്താനും ഈ പുസ്തകങ്ങൾ നിങ്ങളെ സഹായിക്കും.
1. ബികം എ സക്സസ്ഫുൾ ഫസ്റ്റ് ടൈം സിഇഒ (Become a Successful First-Time CEO)
ഒരു സ്ഥാപനത്തിന്റെ തലപ്പത്തേക്ക് ആദ്യമായി എത്തുന്ന ഒരാൾ നേരിടുന്ന വെല്ലുവിളികൾ വലുതാണ്. ഈ യാത്രയിൽ ആത്മവിശ്വാസം നൽകാനും ഒരു നേതാവിന് വേണ്ട കഴിവുകൾ വളർത്തിയെടുക്കാനും സഹായിക്കുന്ന പുസ്തകമാണിത്. പ്രൊഫഷണൽ കോച്ചായ ഡേവിഡ് റോച്ചെ, തന്റെ 28 വർഷത്തെ അനുഭവസമ്പത്തിന്റെ വെളിച്ചത്തിൽ, യഥാർത്ഥ ജീവിത ഉദാഹരണങ്ങളിലൂടെ ഒരു മികച്ച സിഇഒ ആകാനുള്ള പ്രായോഗിക മാർഗ്ഗങ്ങൾ ഈ പുസ്തകത്തിൽ വിവരിക്കുന്നു.
2. നയൺ ടൈപ്പ്സ് ഓഫ് ലീഡർ (The Nine Types of Leader)
ഓരോ സാഹചര്യത്തിനും അനുയോജ്യരായ നേതാക്കൾ വ്യത്യസ്തരാണ്. ഈ പുസ്തകം ഒൻപത് തരത്തിലുള്ള നേതൃത്വ ശൈലികളെ പരിചയപ്പെടുത്തുന്നു. ഇതിൽ നിങ്ങളുടെ ശൈലി ഏതാണെന്ന് തിരിച്ചറിയാനും അത് എങ്ങനെ കൂടുതൽ മെച്ചപ്പെടുത്താമെന്നും ഈ പുസ്തകം മനസ്സിലാക്കിത്തരുന്നു. ജെയിംസ് ആഷ്ടൺ എഴുതിയ ഈ പുസ്തകം സ്വന്തം കഴിവുകളെ തിരിച്ചറിഞ്ഞ് ഒരു മികച്ച നേതാവാകാൻ ആഗ്രഹിക്കുന്ന ഏതൊരാൾക്കും മുതൽക്കൂട്ടാണ്.
3. സ്റ്റാർട്ടപ്പ്സ് ഓഫ് ഭാരത് (Startups of Bharat)
സ്വന്തമായി ഒരു സംരംഭം തുടങ്ങാൻ ആഗ്രഹിക്കുന്നവർക്ക് പ്രചോദനവും വഴികാട്ടിയുമാണ് ഈ പുസ്തകം. 30 വയസ്സിനു മുൻപ് കോടികൾ വിലമതിക്കുന്ന കമ്പനികൾ കെട്ടിപ്പടുത്ത ഫിസിക്സ് വാല, ഭാരത് പേ തുടങ്ങിയ ഇന്ത്യൻ സ്റ്റാർട്ടപ്പുകളുടെ വിജയകഥകളാണ് ഇതിന്റെ ഉള്ളടക്കം. ആദിത്യ അറോറയും സൂര്യ പാസ്രിച്ചയും ചേർന്നെഴുതിയ ഈ പുസ്തകം, ഒരു സംരംഭകൻ നേരിടുന്ന തടസ്സങ്ങളെയും അവയെ മറികടക്കാനുള്ള വഴികളെയും കുറിച്ച് ലളിതമായി വിവരിക്കുന്നു.
4. ബൈ ബാക്ക് യുവർ ടൈം (Buy Back Your Time)
സമയം ഫലപ്രദമായി വിനിയോഗിക്കുക എന്നത് സംരംഭക ലോകത്തെ പ്രധാന വെല്ലുവിളിയാണ്. നമ്മുടെ സമയം എങ്ങനെ ബുദ്ധിപരമായി ലാഭിക്കാം, അത് എങ്ങനെ മികച്ച രീതിയിൽ നിക്ഷേപിക്കാം എന്നതിനെക്കുറിച്ചുള്ള പ്രായോഗികമായ ഉപദേശങ്ങളാണ് സംരംഭകനായ ഡാൻ മാർട്ടൽ ഈ പുസ്തകത്തിലൂടെ പങ്കുവെക്കുന്നത്. ജോലിയിലും ജീവിതത്തിലും സമയം ശരിയായി കൈകാര്യം ചെയ്യാൻ ആഗ്രഹിക്കുന്ന ഏതൊരാൾക്കും ഈ പുസ്തകം പ്രയോജനപ്പെടും.
5. ദ് ഡയറി ഓഫ് എ സിഇഒ (The Diary of a CEO)
ലോകത്തിലെ ഏറ്റവും പ്രശസ്തമായ പോഡ്കാസ്റ്റുകളിൽ ഒന്നായ ‘ദ് ഡയറി ഓഫ് എ സിഇഒ’യുടെ അവതാരകനായ സ്റ്റീവൻ ബാർട്ട്ലെറ്റിന്റെ ഈ പുസ്തകം, ലോകത്തിലെ ഏറ്റവും വിജയികളായ മനുഷ്യരുടെ ജീവിതാനുഭവങ്ങളെ അടിസ്ഥാനമാക്കിയുള്ളതാണ്. ജോലിയിലും വ്യക്തിജീവിതത്തിലും വിജയം കൈവരിക്കാൻ സഹായിക്കുന്ന 33 നിയമങ്ങളാണ് ഈ പുസ്തകത്തിന്റെ കാതൽ. പ്രചോദനാത്മകമായ ചിന്തകളും പ്രായോഗികമായ തന്ത്രങ്ങളും കൊണ്ട് സമ്പന്നമാണ് ഈ പുസ്തകം.