അമ്മയാകാൻ ഒരുങ്ങുന്ന ഏതൊരു സ്ത്രീയെ സംബന്ധിച്ചും സന്തോഷവും ആകാംഷയും നിറഞ്ഞ കാലമാണ് ഗർഭകാലം. എന്നാൽ ഈ ഒൻപത് മാസക്കാലയളവിൽ ചില ആരോഗ്യപരമായ വെല്ലുവിളികളും ഉണ്ടാകാം. ഗർഭിണികൾ നിർബന്ധമായും അറിഞ്ഞിരിക്കേണ്ടതും എന്നാൽ കൃത്യമായ പരിചരണത്തിലൂടെയും നിരീക്ഷണത്തിലൂടെയും നിയന്ത്രിക്കാവുന്നതുമായ മൂന്ന് പ്രധാന സങ്കീർണതകൾ ഇവയാണ്. ഇവയെക്കുറിച്ച് അറിയുന്നത് ആവശ്യമായ മുൻകരുതലുകൾ എടുക്കാൻ സഹായിക്കും.
1. ഗർഭകാല പ്രമേഹം (Gestational Diabetes)
ഗർഭാവസ്ഥയിലെ ഹോർമോൺ വ്യതിയാനങ്ങൾ കാരണം ചില സ്ത്രീകളിൽ രക്തത്തിലെ പഞ്ചസാരയുടെ അളവ് താൽക്കാലികമായി കൂടുന്ന അവസ്ഥയാണിത്.
- അപകടസാധ്യതകൾ: ഇത് അമ്മയുടെ രക്തസമ്മർദ്ദം വർധിപ്പിക്കാനും കുഞ്ഞിന്റെ വലുപ്പം അമിതമായി വർധിപ്പിച്ച് സിസേറിയനിലേക്ക് നയിക്കാനും കാരണമാകും. ഇത്തരം അമ്മമാർക്ക് ഭാവിയിൽ ടൈപ്പ് 2 പ്രമേഹം വരാനുള്ള സാധ്യത കൂടുതലാണ്. ഈ അമ്മമാർക്ക് ജനിക്കുന്ന കുഞ്ഞുങ്ങൾക്ക് ഭാവിയിൽ അമിതവണ്ണത്തിനും പ്രമേഹത്തിനും സാധ്യതയുണ്ട്.
- ലക്ഷണങ്ങൾ: അമിതമായ ദാഹം, അടിക്കടിയുള്ള മൂത്രമൊഴിക്കൽ, ഓക്കാനം എന്നിവയാണ് പ്രധാന ലക്ഷണങ്ങൾ.
- പരിഹാരം: ആരോഗ്യകരമായ ഭക്ഷണക്രമം, ചിട്ടയായ വ്യായാമം എന്നിവയിലൂടെ ഇത് നിയന്ത്രിക്കാം. ചിലർക്ക് മരുന്നുകളോ ഇൻസുലിനോ വേണ്ടിവന്നേക്കാം. കൃത്യമായ പരിശോധനകളിലൂടെ ഇത് നേരത്തെ തിരിച്ചറിയേണ്ടത് അത്യാവശ്യമാണ്.
2. പ്രീഎക്ലാംപ്സിയ (Preeclampsia)
ഗർഭത്തിന്റെ 20 ആഴ്ചകൾക്ക് ശേഷം ഉയർന്ന രക്തസമ്മർദ്ദവും, കരൾ, വൃക്ക തുടങ്ങിയ ആന്തരികാവയവങ്ങളെ ബാധിക്കുന്നതുമായ ഒരു ഗുരുതര അവസ്ഥയാണിത്.
- അപകടസാധ്യതകൾ: ചികിത്സിച്ചില്ലെങ്കിൽ ഇത് അമ്മയിൽ അവയവങ്ങൾക്കു നാശം, ഹൃദയസംബന്ധമായ പ്രശ്നങ്ങൾ, അപസ്മാരം (eclampsia) എന്നിവയ്ക്ക് കാരണമാകും. കുഞ്ഞിന് തൂക്കക്കുറവ്, മാസം തികയാതെയുള്ള പ്രസവം, ഗർഭപാത്രത്തിൽ നിന്ന് മറുപിള്ള വേർപെട്ടുപോകുന്ന അവസ്ഥ എന്നിവയ്ക്കും ഇത് ഇടയാക്കും.
- ലക്ഷണങ്ങൾ: കടുത്ത തലവേദന, കാഴ്ചയിലെ മാറ്റങ്ങൾ, വയറിന്റെ മുകൾ ഭാഗത്ത് വേദന, ഓക്കാനം, പെട്ടെന്നുള്ള ശരീരഭാര വർധന, കൈകളിലും മുഖത്തുമുണ്ടാകുന്ന നീര് എന്നിവയെല്ലാം ഇതിന്റെ ലക്ഷണങ്ങളാണ്.
- പരിഹാരം: രക്തസമ്മർദ്ദം നിയന്ത്രിക്കാനുള്ള മരുന്നുകളും കർശനമായ നിരീക്ഷണവുമാണ് പ്രധാനം. പലപ്പോഴും, അമ്മയുടെയും കുഞ്ഞിന്റെയും സുരക്ഷ ഉറപ്പാക്കാൻ നേരത്തെയുള്ള പ്രസവം വേണ്ടിവരും. ഇതിന്റെ ഏക പ്രതിവിധി പ്രസവം തന്നെയാണ്.
3. പ്ലാസന്റ പ്രീവിയ (Placenta Previa)
മറുപിള്ള (placenta) ഗർഭാശയമുഖത്തെ ഭാഗികമായോ പൂർണ്ണമായോ മറഞ്ഞിരിക്കുന്ന അവസ്ഥയാണിത്.
- അപകടസാധ്യതകൾ: ഗർഭാവസ്ഥയിലോ പ്രസവസമയത്തോ കനത്ത രക്തസ്രാവത്തിന് ഇത് കാരണമാകും. ഇത് അമ്മയുടെ ജീവന് തന്നെ ഭീഷണിയായേക്കാം. ഇത് സിസേറിയന്റെ സാധ്യത വർധിപ്പിക്കുന്നു. ചിലരിൽ മറുപിള്ള ഗർഭാശയ ഭിത്തിയിലേക്ക് ആഴത്തിൽ വളരുന്ന പ്ലാസന്റ അക്രെറ്റ (placenta accreta) എന്ന അതീവ ഗുരുതരമായ അവസ്ഥയിലേക്കും ഇത് നയിച്ചേക്കാം.
- ലക്ഷണങ്ങൾ: ഗർഭകാലത്തിന്റെ രണ്ടാം ഘട്ടത്തിലോ അവസാന ഘട്ടത്തിലോ ഉണ്ടാകുന്ന വേദനയില്ലാത്ത, കടും ചുവപ്പുനിറത്തിലുള്ള യോനീ രക്തസ്രാവമാണ് ഇതിന്റെ പ്രധാന ലക്ഷണം.
- പരിഹാരം: ഈ അവസ്ഥ കണ്ടെത്തിയാൽ പൂർണ്ണ വിശ്രമം ആവശ്യമാണ്. ഭാരമുള്ള ജോലികൾ ഒഴിവാക്കുകയും കൃത്യമായ ഇടവേളകളിൽ നിരീക്ഷിക്കുകയും വേണം.
ഈ സങ്കീർണതകളെ ഭയക്കുകയല്ല, മറിച്ച് അറിഞ്ഞിരിക്കുകയാണ് വേണ്ടത്. കൃത്യമായ ഗർഭകാല പരിചരണവും പരിശോധനകളും ഡോക്ടറുടെ നിർദേശങ്ങൾ പാലിക്കുന്നതും വഴി ഇത്തരം അപകടസാധ്യതകളെ മറികടന്ന് അമ്മയ്ക്കും കുഞ്ഞിനും സുരക്ഷിതമായ ഒരു പ്രസവം ഉറപ്പാക്കാം.