കൊൽക്കത്ത: ഫുട്ബോൾ ഇതിഹാസം ലയണൽ മെസ്സിയുടെ ഇന്ത്യൻ പര്യടനത്തിന് അന്തിമ അനുമതിയായി. ‘ഗോട്ട് ടൂർ ഓഫ് ഇന്ത്യ 2025’ എന്ന് പേരിട്ടിരിക്കുന്ന പര്യടനം ഡിസംബർ 12-ന് കൊൽക്കത്തയിൽ ആരംഭിക്കും. കൊൽക്കത്തയ്ക്ക് പുറമെ അഹമ്മദാബാദ്, മുംബൈ, ഡൽഹി എന്നീ നഗരങ്ങളിലും മെസ്സി എത്തും. ഡിസംബർ 15-ന് പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയോടെയായിരിക്കും പര്യടനം അവസാനിക്കുകയെന്ന് പരിപാടിയുടെ പ്രൊമോട്ടറായ ശതദ്രു ദത്ത അറിയിച്ചു.
2011-ന് ശേഷം ഇത് ആദ്യമായാണ് മെസ്സി ഇന്ത്യ സന്ദർശിക്കുന്നത്. അന്ന് വെനസ്വേലയ്ക്കെതിരായ സൗഹൃദ മത്സരത്തിനായി അർജന്റീന ദേശീയ ടീമിനൊപ്പമാണ് താരം എത്തിയത്. ഇത്തവണ ഇന്റർ മയാമിയിലെ സഹതാരങ്ങളായ റോഡ്രിഗോ ഡി പോൾ, ലൂയിസ് സുവാരസ്, ജോർഡി ആൽബ, സെർജിയോ ബുസ്ക്വെറ്റ്സ് എന്നിവരും മെസ്സിക്കൊപ്പം ഉണ്ടാകാൻ സാധ്യതയുണ്ടെന്ന് റിപ്പോർട്ടുകളുണ്ട്.
പര്യടനത്തിലെ പ്രധാന പരിപാടികൾ:
- കൊൽക്കത്ത (ഡിസംബർ 12-13): ഡിസംബർ 12-ന് രാത്രി കൊൽക്കത്തയിലെത്തുന്ന മെസ്സി, 13-ന് രാവിലെ ആരാധകരുമായി സംവദിക്കും. ഈഡൻ ഗാർഡൻസിലോ സാൾട്ട് ലേക്ക് സ്റ്റേഡിയത്തിലോ മെസ്സിയുടെ പ്രതിമ അനാച്ഛാദനം ചെയ്യും. തുടർന്ന് നടക്കുന്ന സംഗീത പരിപാടിയിലും പ്രദർശന മത്സരത്തിലും സൗരവ് ഗാംഗുലി, ലിയാണ്ടർ പേസ്, ജോൺ എബ്രഹാം, ബൈചുങ് ബൂട്ടിയ തുടങ്ങിയ പ്രമുഖർക്കൊപ്പം മെസ്സിയും പങ്കെടുക്കും.
- അഹമ്മദാബാദ് (ഡിസംബർ 13): വൈകുന്നേരം അദാനി ഫൗണ്ടേഷൻ സംഘടിപ്പിക്കുന്ന സ്വകാര്യ ചടങ്ങിൽ മെസ്സി പങ്കെടുക്കും.
- മുംബൈ (ഡിസംബർ 14): സച്ചിൻ തെണ്ടുൽക്കർ, എം.എസ്. ധോണി, രോഹിത് ശർമ്മ തുടങ്ങിയ ക്രിക്കറ്റ് ഇതിഹാസങ്ങൾക്കൊപ്പം മഹാരാഷ്ട്ര ക്രിക്കറ്റ് അസോസിയേഷൻ സംഘടിപ്പിക്കുന്ന ‘ഗോട്ട് ക്യാപ്റ്റൻസ് മൊമെന്റ്’ എന്ന പരിപാടിയിൽ മെസ്സി പങ്കെടുക്കും. ബോളിവുഡ് താരങ്ങളായ രൺവീർ സിംഗും ആമിർ ഖാനും ചടങ്ങിൽ സന്നിഹിതരാകും.
- ഡൽഹി (ഡിസംബർ 15): പര്യടനത്തിന്റെ അവസാന ദിവസം ഡൽഹിയിലെത്തുന്ന മെസ്സി, പ്രധാനമന്ത്രി നരേന്ദ്ര മോദിയുമായി അദ്ദേഹത്തിന്റെ വസതിയിൽ കൂടിക്കാഴ്ച നടത്തും. തുടർന്ന് ഫിറോസ് ഷാ കോട്ലയിൽ നടക്കുന്ന പരിപാടിയിലും പങ്കെടുക്കും.