ലോകത്തിലെ ഏറ്റവും വലിയ സാറ്റലൈറ്റ് ഇന്റർനെറ്റ് ശൃംഖലയായ സ്റ്റാർലിങ്ക് ഇന്ത്യയിലേക്ക് വരുന്നു. ശതകോടീശ്വരൻ ഇലോൺ മസ്കിന്റെ ഉടമസ്ഥതയിലുള്ള സ്പേസ്എക്സിന്റെ ഈ സംരംഭത്തിന് കേന്ദ്രസർക്കാരിന്റെ അനുമതി ലഭിച്ചതോടെ, രാജ്യത്തെ ഇന്റർനെറ്റ് സേവന രംഗത്ത് വലിയൊരു മാറ്റത്തിനാണ് കളമൊരുങ്ങുന്നത്. നഗര-ഗ്രാമ വ്യത്യാസമില്ലാതെ അതിവേഗ ഇന്റർനെറ്റ് എത്തിക്കുകയാണ് സ്റ്റാർലിങ്ക് ലക്ഷ്യമിടുന്നത്.
എത്ര രൂപ മുടക്കണം?
സ്റ്റാർലിങ്ക് സേവനം ഉപയോഗിക്കാൻ പ്രതിമാസ വരിസംഖ്യയും ഉപകരണങ്ങൾക്കുള്ള ഒറ്റത്തവണത്തെ ചെലവും ഉണ്ടാകും. റിപ്പോർട്ടുകൾ പ്രകാരം, പ്രതിമാസം 3,000 മുതൽ 4,200 രൂപ വരെയായിരിക്കും വരിസംഖ്യ. എന്നാൽ ഇത് കൂടാതെ, വൈ-ഫൈ റൂട്ടറും സാറ്റലൈറ്റ് ഡിഷും അടങ്ങുന്ന സ്റ്റാർലിങ്ക് കിറ്റിനായി ഏകദേശം 33,000 രൂപയും മുടക്കേണ്ടി വരും.
അമേരിക്കയിൽ സാധാരണ സ്റ്റാർലിങ്ക് കിറ്റിന് ഏകദേശം 30,000 രൂപയും, യാത്രയ്ക്കിടയിൽ ഉപയോഗിക്കാൻ സാധിക്കുന്ന സ്റ്റാർലിങ്ക് മിനി കിറ്റിന് ഏകദേശം 43,000 രൂപയുമാണ് വില. ഇന്ത്യയിലും ഇതിന് സമാനമായ വില പ്രതീക്ഷിക്കാം.
എന്നാണ് സ്റ്റാർലിങ്ക് ഇന്ത്യയിൽ എത്തുന്നത്?
സ്റ്റാർലിങ്കിന് രാജ്യത്ത് പ്രവർത്തിക്കാനുള്ള അനുമതി ഇന്ത്യൻ നാഷണൽ സ്പേസ് പ്രൊമോഷൻ ആൻഡ് ഓതറൈസേഷൻ സെന്റർ (IN-SPACe) നൽകിയിട്ടുണ്ട്. എന്നാൽ, സേവനം ആരംഭിക്കുന്നതിന് മുൻപ് സ്പെക്ട്രം അനുവദിക്കേണ്ടതുണ്ട്. ഈ വർഷം അവസാനത്തോടെയോ അടുത്ത വർഷം ആദ്യമോ സ്റ്റാർലിങ്ക് ഇന്ത്യയിൽ ലഭ്യമായിത്തുടങ്ങുമെന്നാണ് പ്രതീക്ഷിക്കുന്നത്.
ജിയോയും എയർടെലുമായി സഹകരണം
റിലയൻസ് ജിയോ, ഭാരതി എയർടെൽ തുടങ്ങിയ പ്രമുഖ ടെലികോം കമ്പനികളുമായി സ്റ്റാർലിങ്ക് സഹകരണ കരാറുകളിൽ ഒപ്പുവെച്ചിട്ടുണ്ട്. ഈ കമ്പനികളുടെ റീട്ടെയിൽ സ്റ്റോറുകൾ വഴി സ്റ്റാർലിങ്ക് ഉപകരണങ്ങൾ വിൽക്കാനും സാധ്യതയുണ്ട്. ഈ സഹകരണം സ്റ്റാർലിങ്കിന്റെ വിലയിലും ലഭ്യതയിലും എങ്ങനെ പ്രതിഫലിക്കുമെന്ന് കണ്ടറിയണം. ഗ്രാമീണ മേഖലകളിലും ഇന്റർനെറ്റ് സേവനം ലഭ്യമല്ലാത്ത ഇടങ്ങളിലും സ്റ്റാർലിങ്ക് വലിയൊരു മാറ്റം കൊണ്ടുവരുമെന്നുറപ്പാണ്.