ഒരൊറ്റ സിനിമകൊണ്ട് മലയാളി മനസ്സിൽ ചിരപ്രതിഷ്ഠ നേടിയ നടിയാണ് ദീപ നായർ. 2000-ൽ പുറത്തിറങ്ങിയ കുഞ്ചാക്കോ ബോബൻ ചിത്രം ‘പ്രിയം’ എന്ന സിനിമയിലൂടെയാണ് ദീപ പ്രേക്ഷകരുടെ പ്രിയങ്കരിയായത്. എന്നാൽ ഈ ഒറ്റ സിനിമയ്ക്ക് ശേഷം ദീപയെ പിന്നീട് വെള്ളിത്തിരയിൽ കണ്ടിട്ടില്ല. സിനിമാ ജീവിതം ഉപേക്ഷിച്ച് ദീപ പഠനത്തിനും കുടുംബജീവിതത്തിനും പ്രാധാന്യം നൽകുകയായിരുന്നു.
എന്നാൽ വർഷങ്ങളായി ദീപയെക്കുറിച്ച് ഒരു കഥ പ്രചരിക്കുന്നുണ്ടായിരുന്നു. കുഞ്ചാക്കോ ബോബനൊപ്പം അഭിനയിക്കണമെന്ന ആഗ്രഹം സഫലീകരിക്കാൻ ദീപയുടെ അച്ഛൻ ‘പ്രിയം’ എന്ന സിനിമ നിർമ്മിച്ചു എന്നായിരുന്നു ആ കഥ. ഇപ്പോഴിതാ ഈ കഥകൾക്ക് മറുപടിയുമായി ദീപ തന്നെ രംഗത്തെത്തിയിരിക്കുകയാണ്. ഒരു ബിസിനസ് ആവശ്യത്തിനായി പുതിയ സോഷ്യൽ മീഡിയ പേജ് ആരംഭിച്ച ദീപയോട് ആരാധകർ ഇക്കാര്യം ചോദിച്ചപ്പോഴാണ് അവർ സത്യം വെളിപ്പെടുത്തിയത്.
തന്റെ അച്ഛൻ സിനിമ നിർമ്മിച്ചിട്ടില്ലെന്നും, അത്തരം കഥകൾ കെട്ടിച്ചമച്ചതാണെന്നും ദീപ വ്യക്തമാക്കി. സിനിമയുടെ നിർമ്മാതാവിന്റെ പേരിൽ നായർ എന്ന് ഉണ്ടായിരുന്നത് കൊണ്ടാണ് അങ്ങനെയൊരു തെറ്റിദ്ധാരണ ഉണ്ടായതെന്നും അവർ കൂട്ടിച്ചേർത്തു. നിലവിൽ സോഫ്റ്റ്വെയർ എഞ്ചിനീയറായ ദീപ, ഭർത്താവ് രാജീവിനും രണ്ട് പെൺമക്കളായ ശ്രദ്ധയ്ക്കും മാധവിക്കും ഒപ്പം ഓസ്ട്രേലിയയിലെ മെൽബണിലാണ് താമസിക്കുന്നത്. സമൂഹമാധ്യമങ്ങളിൽ സജീവമായ ദീപ തന്റെ കുടുംബവിശേഷങ്ങൾ പങ്കുവെക്കാറുണ്ട്. അടുത്തിടെ തിരുവനന്തപുരത്ത് ആറ്റുകാൽ പൊങ്കാലയിൽ പങ്കെടുക്കാനും ദീപ എത്തിയിരുന്നു.
another