യുഎസ് പ്രസിഡന്റ് ഡൊണാൾഡ് ട്രംപും റഷ്യൻ പ്രസിഡന്റ് വ്ളാഡിമിർ പുടിനും തമ്മിൽ ഓഗസ്റ്റ് 15-ന് അലാസ്കയിൽ നടക്കുന്ന ഉച്ചകോടിയിലേക്ക് യുക്രൈൻ പ്രസിഡന്റ് വൊളോഡിമിർ സെലെൻസ്കിയെയും ക്ഷണിക്കാൻ സാധ്യത. യുക്രൈൻ യുദ്ധം അവസാനിപ്പിക്കുന്നത് ലക്ഷ്യമിട്ടുള്ള ചർച്ചകളിൽ സെലെൻസ്കിയെക്കൂടി ഉൾപ്പെടുത്തുന്നത് വൈറ്റ് ഹൗസിന്റെ പരിഗണനയിലാണെന്ന് യുഎസ് ഉദ്യോഗസ്ഥരെ ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.
ത്രിരാഷ്ട്ര തലത്തിലുള്ള ഒരു ഉച്ചകോടിക്ക് ട്രംപ് തയ്യാറാണെന്ന് ഒരു മുതിർന്ന വൈറ്റ് ഹൗസ് ഉദ്യോഗസ്ഥൻ സ്ഥിരീകരിച്ചിട്ടുണ്ട്. എന്നാൽ, നിലവിൽ പുടിന്റെ അഭ്യർത്ഥന പ്രകാരമുള്ള ഉഭയകക്ഷി ചർച്ചയ്ക്കാണ് പ്രാധാന്യം നൽകുന്നതെന്നും അദ്ദേഹം കൂട്ടിച്ചേർത്തു. സെലെൻസ്കിയുടെ സന്ദർശനം സംബന്ധിച്ച് അന്തിമ തീരുമാനമായിട്ടില്ലെന്നും ചർച്ചകൾ പുരോഗമിക്കുകയാണെന്നും റിപ്പോർട്ടുകൾ വ്യക്തമാക്കുന്നു.
യുക്രൈനിലെ സംഘർഷത്തിന് ദീർഘകാല സമാധാനപരമായ പരിഹാരം കണ്ടെത്തുകയാണ് ചർച്ചയുടെ പ്രധാന ലക്ഷ്യം. എന്നാൽ, സമാധാന കരാറിനായി ചിലപ്പോൾ ഭൂപ്രദേശങ്ങൾ പരസ്പരം കൈമാറേണ്ടി വരുമെന്ന ട്രംപിന്റെ പ്രസ്താവനയും ചർച്ചകൾക്ക് വഴിതുറന്നിട്ടുണ്ട്. അതേസമയം, തങ്ങളെ ഒഴിവാക്കിയുള്ള ഒരു സമാധാന ചർച്ചയും അംഗീകരിക്കില്ലെന്നും രാജ്യത്തിന്റെ ഒരിഞ്ച് ഭൂമി പോലും വിട്ടുകൊടുക്കില്ലെന്നും സെലെൻസ്കി ശക്തമായ നിലപാട് എടുത്തിട്ടുണ്ട്.