രാവിലെ ഉണരുമ്പോൾ തന്നെ നിർത്താതെ തുമ്മുകയോ, തൊണ്ട ചൊറയുകയോ ചെയ്യുന്നുണ്ടെങ്കിൽ കാരണം മറ്റെവിടെയും തിരയേണ്ട, നിങ്ങളുടെ തലയണയായിരിക്കാം ആ വില്ലൻ. നിങ്ങൾ ശ്രദ്ധിക്കാതെ പോകുന്ന, എന്നാൽ ആരോഗ്യത്തെ സാരമായി ബാധിക്കുന്ന നിരവധി ഘടകങ്ങൾ തലയണയിലും അതിന്റെ കവറിലുമുണ്ട്.
തലയണയിലെ അദൃശ്യരായ ശത്രുക്കൾ
നമ്മൾ ഉറങ്ങുമ്പോൾ ശരീരത്തിൽ നിന്നുള്ള മൃതകോശങ്ങൾ, വിയർപ്പ്, ഉമിനീര്, മുടി എന്നിവ തലയണയിൽ പറ്റിപ്പിടിക്കും. ഇത് ബാക്ടീരിയ, ഫംഗസ് എന്നിവയ്ക്ക് വളരാൻ അനുകൂലമായ സാഹചര്യം ഒരുക്കുന്നു. സാധാരണയായി ഉപയോഗിക്കുന്ന ഒരു തലയണക്കവറിൽ, ടോയ്ലറ്റ് സീറ്റിനേക്കാൾ 17,000 മടങ്ങ് വരെ ബാക്ടീരിയകൾ ഉണ്ടാകാം.
ഇവ കൂടാതെ, നഗ്നനേത്രങ്ങൾ കൊണ്ട് കാണാൻ കഴിയാത്ത പൊടിയിലെ ചെള്ളുകൾ (Dust mites) ദശലക്ഷക്കണക്കിന് എണ്ണത്തിൽ തലയണയിലും കിടക്കയിലും ഉണ്ടാകാം. ഇവയുടെ വിസർജ്യവും ശരീരഭാഗങ്ങളുമാണ് പലപ്പോഴും അലർജിക്ക് കാരണമാകുന്നത്. ഇത് ആസ്ത്മയുടെ ലക്ഷണങ്ങൾ വർദ്ധിപ്പിക്കാനും, തുടർച്ചയായ ജലദോഷം, കണ്ണുകൾക്ക് ചൊറിച്ചിൽ, തുമ്മൽ, ചർമ്മത്തിൽ തടിപ്പുകൾ എന്നിവയ്ക്കും ഇടയാക്കും. അതുപോലെ, പഴയ തലയണകളിൽ ഈർപ്പം തങ്ങിനിന്ന് പൂപ്പൽ (mould) വളരാനും സാധ്യതയുണ്ട്, ഇത് ശ്വാസകോശ സംബന്ധമായ പ്രശ്നങ്ങൾക്ക് കാരണമാകും.
എന്താണ് പരിഹാരം?
- വൃത്തിയായി സൂക്ഷിക്കുക: തലയണക്കവറുകൾ കുറഞ്ഞത് രണ്ട് ദിവസം കൂടുമ്പോഴെങ്കിലും മാറ്റി ചൂടുവെള്ളത്തിൽ കഴുകാൻ ശ്രദ്ധിക്കുക. തണുത്ത വെള്ളത്തിൽ കഴുകുന്നത് പൊടിയിലെ ചെള്ളുകളെ പൂർണ്ണമായി നശിപ്പിക്കില്ല.
- കൃത്യമായി മാറ്റുക: 12 മുതൽ 18 മാസം വരെ ഉപയോഗിച്ച തലയണകൾ മാറ്റുന്നതാണ് ആരോഗ്യത്തിന് നല്ലത്. കാലപ്പഴക്കം കൊണ്ട് തലയണയുടെ രൂപം നഷ്ടപ്പെടുകയും അതിൽ ഫംഗസ് ബാധയുണ്ടാകാനുള്ള സാധ്യത വർധിക്കുകയും ചെയ്യും.
- അലർജി പ്രൂഫ് കവറുകൾ: പൊടിയിലെ ചെള്ളുകളെയും മറ്റ് അലർജി ഘടകങ്ങളെയും തടയുന്ന പ്രത്യേകതരം ഹൈപ്പോഅലർജെനിക് കവറുകൾ ഉപയോഗിക്കുന്നത് ഒരു പരിധി വരെ സഹായകമാകും. ഇത് പൊടിയിലെ ചെള്ളുകളിൽ നിന്നുള്ള അലർജിയുടെ സാധ്യത ഗണ്യമായി കുറയ്ക്കുന്നു. ആസ്ത്മ രോഗികളായ കുട്ടികളിൽ ഇത് മരുന്നിന്റെ ഉപയോഗം കുറയ്ക്കാൻ സഹായിച്ചേക്കാം.