ന്യൂഡൽഹി: ഇംഗ്ലണ്ടിനെതിരെ ഓവലിൽ നേടിയ ചരിത്ര വിജയത്തിൽ ഇന്ത്യൻ ക്രിക്കറ്റ് ടീമിനെ അഭിനന്ദിച്ചും, നേരത്തെ ടീമിന്റെ കഴിവിൽ സംശയം പ്രകടിപ്പിച്ചതിൽ ക്ഷമാപണം നടത്തിയും കോൺഗ്രസ് എംപി ശശി തരൂർ. ടീമിന്റെ അവിശ്വസനീയമായ വിജയത്തിൽ ആവേശം പ്രകടിപ്പിച്ച അദ്ദേഹം, ടീം ഇന്ത്യയുടെ മനോബലത്തെയും ദൃഢനിശ്ചയത്തെയും പ്രശംസിച്ചു.
“വാക്കുകൾ കിട്ടുന്നില്ല. എന്തൊരു വിജയം! ഈ ടീം വളരെ സവിശേഷമാണ്,” തരൂർ എക്സിൽ (ട്വിറ്റർ) കുറിച്ചു. ഇതിന് പിന്നാലെയാണ്, തലേദിവസം മത്സരഫലത്തിൽ സംശയം പ്രകടിപ്പിച്ചതിലുള്ള ഖേദപ്രകടനവുമായി അദ്ദേഹത്തിന്റെ അടുത്ത ട്വീറ്റ് വന്നത്. “ടീമിനെക്കുറിച്ച് സംശയം പ്രകടിപ്പിച്ചതിൽ ഖേദിക്കുന്നു. നമ്മുടെ നായകന്മാർക്ക് ആശംസകൾ,” അദ്ദേഹം കൂട്ടിച്ചേർത്തു.
നേരത്തെ, വിരാട് കോഹ്ലിയുടെ അഭാവം ടീമിനെ ബാധിച്ചുവെന്നും അദ്ദേഹത്തിന്റെ സാന്നിധ്യം മത്സരഫലത്തെ സ്വാധീനിക്കുമായിരുന്നുവെന്നും തരൂർ അഭിപ്രായപ്പെട്ടിരുന്നു. എന്നാൽ, എല്ലാ സംശയങ്ങളെയും മറികടന്നുള്ള ടീമിന്റെ ഉജ്ജ്വല വിജയമാണ് തരൂരിനെക്കൊണ്ട് നിലപാട് മാറ്റാനും ക്ഷമാപണം നടത്താനും പ്രേരിപ്പിച്ചത്.