ഇന്ത്യയിൽ ഐഫോണുകളുടെ വിൽപ്പന കുതിച്ചുയരുന്ന സാഹചര്യത്തിൽ, രാജ്യത്ത് കൂടുതൽ റീട്ടെയിൽ സ്റ്റോറുകൾ തുറക്കാൻ ഒരുങ്ങി ആപ്പിൾ. 2025-ന്റെ അവസാനത്തോടെ പുതിയ സ്റ്റോറുകൾ തുറക്കുമെന്ന് ആപ്പിൾ സിഇഒ ടിം കുക്ക് അറിയിച്ചു. നിലവിൽ മുംബൈയിലെ ബികെസിയിലും ഡൽഹിയിലെ സാകേതിലുമുള്ള ആപ്പിൾ സ്റ്റോറുകൾ വൻ വിജയമാണ്.
പുതിയ സ്റ്റോറുകൾ എവിടെയൊക്കെ?
പുതിയ സ്റ്റോറുകൾ എവിടെയൊക്കെ വരുമെന്ന് ആപ്പിൾ ഔദ്യോഗികമായി സ്ഥിരീകരിച്ചിട്ടില്ലെങ്കിലും, ചില നഗരങ്ങൾ സാധ്യതാ പട്ടികയിൽ ഇടംപിടിച്ചിട്ടുണ്ട്:
- മുംബൈ (സ്കൈ സിറ്റി മാൾ)
- ബെംഗളൂരു (ഫീനിക്സ് മാൾ ഓഫ് ഏഷ്യ)
- പൂനെ (കോപ മാൾ)
- നോയിഡ (ഡിഎൽഎഫ് മാൾ)
ഈ സ്റ്റോറുകളിലേക്ക് ആപ്പിൾ ഇതിനോടകം ജീവനക്കാരെ തിരഞ്ഞെടുത്തു തുടങ്ങിയതായും റിപ്പോർട്ടുകളുണ്ട്. എന്നാൽ, ദക്ഷിണേന്ത്യയിൽ കേരളം ഉൾപ്പെടെയുള്ള മറ്റ് നഗരങ്ങളിൽ സ്റ്റോറുകൾ വരുമോ എന്ന കാര്യത്തിൽ വ്യക്തതയില്ല.
ഐഫോണുകൾ, ഐപാഡുകൾ, മാക്കുകൾ, ആപ്പിൾ വാച്ചുകൾ എന്നിവയെല്ലാം നേരിൽ കണ്ട് വാങ്ങാനും അനുഭവിച്ചറിയാനും ഈ സ്റ്റോറുകൾ അവസരമൊരുക്കും. ഇന്ത്യക്ക് പുറമെ, ഗൾഫ് രാജ്യങ്ങളിലും ജപ്പാനിലും ആപ്പിൾ തങ്ങളുടെ സ്റ്റോറുകൾ വ്യാപിപ്പിക്കുന്നുണ്ട്.