കൊച്ചി: പ്രമുഖ സാഹിത്യകാരനും നിരൂപകനും ജീവചരിത്രകാരനുമായ പ്രൊഫ. എം.കെ. സാനു (100) അന്തരിച്ചു. കൊച്ചിയിലെ വസതിയിൽ വെച്ചായിരുന്നു അന്ത്യം. വാർധക്യസഹജമായ അസുഖങ്ങളെ തുടർന്ന് ഏറെ നാളായി വിശ്രമത്തിലായിരുന്നു.
എഴുത്തുകാരൻ, പ്രഭാഷകൻ, അധ്യാപകൻ, സാമൂഹിക പ്രവർത്തകൻ, മുൻ എംഎൽഎ എന്നിങ്ങനെ കേരളത്തിന്റെ സാംസ്കാരിക, സാമൂഹിക, രാഷ്ട്രീയ രംഗങ്ങളിൽ നിറഞ്ഞുനിന്ന വ്യക്തിത്വമായിരുന്നു സാനു മാഷ്. ശ്രീനാരായണ ഗുരു, കുമാരനാശാൻ, ചങ്ങമ്പുഴ, സഹോദരൻ അയ്യപ്പൻ തുടങ്ങിയവരെക്കുറിച്ചുള്ള അദ്ദേഹത്തിന്റെ ജീവചരിത്രങ്ങൾ ഏറെ പ്രശസ്തമാണ്.
എഴുത്തച്ഛൻ പുരസ്കാരം, കേന്ദ്ര-കേരള സാഹിത്യ അക്കാദമി പുരസ്കാരങ്ങൾ, വയലാർ അവാർഡ്, പത്മപ്രഭാ പുരസ്കാരം തുടങ്ങി നിരവധി ബഹുമതികൾക്ക് അർഹനായിട്ടുണ്ട്. മതനിരപേക്ഷവും പുരോഗമനപരവുമായ ചിന്തകൾക്കൊണ്ട് കേരളീയ സമൂഹത്തിൽ വലിയ സ്വാധീനം ചെലുത്തിയ സാനു മാഷിന്റെ വിയോഗം സാംസ്കാരിക കേരളത്തിന് നികത്താനാവാത്ത നഷ്ടമാണ്.