താരസംഘടനയായ ‘അമ്മ’യിൽ (AMMA) പുതിയ മാറ്റങ്ങൾ കൊണ്ടുവരുക എന്ന ലക്ഷ്യത്തോടെയാണ് പ്രസിഡന്റ് സ്ഥാനത്തേക്ക് മത്സരിക്കുന്നതെന്ന് നടൻ ദേവൻ. സംഘടനയിൽ ആരോപണവിധേയരായവരെ പുറത്താക്കുന്നതിനുള്ള നടപടികൾ ജനറൽ ബോഡിയിൽ സ്വീകരിക്കണമെന്നും അദ്ദേഹം ആവശ്യപ്പെട്ടു.
തന്റെ സ്ഥാനാർത്ഥിത്വത്തെ സംഘപരിവാർ മുഖമായി ചിത്രീകരിക്കാനുള്ള ശ്രമങ്ങൾ മണ്ടത്തരമാണെന്ന് ദേവൻ പ്രതികരിച്ചു. താൻ ബിജെപിയുടെ ഭാഗമായി പ്രവർത്തിച്ചിട്ടുണ്ടെങ്കിലും, ‘അമ്മ’യുടെ പ്രവർത്തനങ്ങളിൽ രാഷ്ട്രീയത്തിന് സ്ഥാനമില്ല. ജാതി, മതം, കക്ഷി രാഷ്ട്രീയം എന്നിവയ്ക്ക് അതീതമായി എല്ലാവരെയും ഒരുമിപ്പിച്ച് മുന്നോട്ട് പോകാനാണ് താൻ ലക്ഷ്യമിടുന്നതെന്നും അദ്ദേഹം വ്യക്തമാക്കി.
പ്രസിഡന്റ് സ്ഥാനത്തേക്ക് തന്നോടൊപ്പം മത്സരിക്കുന്ന ശ്വേതാ മേനോനെ ഒരു മത്സരബുദ്ധിയോടെയാണ് കാണുന്നതെന്നും അതിൽ സന്തോഷമുണ്ടെന്നും ദേവൻ പറഞ്ഞു. മുതിർന്ന അംഗങ്ങളുടെയും പുതിയ തലമുറയുടെയും പിന്തുണ തനിക്കുണ്ടെന്നും, അതുകൊണ്ടുതന്നെ വിജയത്തെക്കുറിച്ച് ശുഭപ്രതീക്ഷയുണ്ടെന്നും അദ്ദേഹം കൂട്ടിച്ചേർത്തു.