ആർത്തവം കൃത്യസമയത്ത് വരാത്തത് പല സ്ത്രീകളിലും ശാരീരികവും മാനസികവുമായ അസ്വസ്ഥതകൾക്ക് കാരണമാകാറുണ്ട്. ഇത് ദേഷ്യം, മാനസിക പിരിമുറുക്കം എന്നിവയിലേക്ക് നയിച്ചേക്കാം. പ്രായപൂർത്തിയാകുന്ന സമയത്തും ആർത്തവവിരാമത്തോട് അടുക്കുമ്പോഴും ആർത്തവചക്രത്തിൽ വ്യതിയാനങ്ങൾ സാധാരണമാണെങ്കിലും, തുടർച്ചയായി ഇത് സംഭവിക്കുന്നത് ശ്രദ്ധിക്കേണ്ട കാര്യമാണ്. ലീലാവതി ആശുപത്രിയിലെ ഗൈനക്കോളജിസ്റ്റായ ഡോ. മാൻസി മേധേക്കർ പറയുന്നതനുസരിച്ച് ക്രമരഹിതമായ ആർത്തവത്തിന് പിന്നിൽ പല കാരണങ്ങളുണ്ട്.
പ്രധാന കാരണങ്ങൾ:
- ഹോർമോൺ വ്യതിയാനങ്ങൾ: പോളിസിസ്റ്റിക് ഓവറി സിൻഡ്രോം (പി.സി.ഒ.എസ്), തൈറോയ്ഡ് രോഗങ്ങൾ, ഗർഭനിരോധന ഗുളികകളുടെ ക്രമമല്ലാത്ത ഉപയോഗം എന്നിവ ഹോർമോൺ സന്തുലിതാവസ്ഥയെ തടസ്സപ്പെടുത്തുകയും ആർത്തവം ക്രമം തെറ്റാൻ കാരണമാകുകയും ചെയ്യും.
- ജീവിതശൈലിയിലെ പ്രശ്നങ്ങൾ: ശരീരഭാരം വർദ്ധിക്കുന്നത്, ആവശ്യത്തിന് ഉറക്കമില്ലായ്മ, അമിതമായ മാനസിക സമ്മർദ്ദം എന്നിവയെല്ലാം ശരീരത്തിന്റെ സ്വാഭാവിക പ്രവർത്തനങ്ങളെ ബാധിക്കുകയും ആർത്തവചക്രത്തിന്റെ താളം തെറ്റിക്കുകയും ചെയ്യും.
- അനാരോഗ്യകരമായ ഭക്ഷണശീലം: എണ്ണയിൽ വറുത്തതും പൊരിച്ചതുമായ ഭക്ഷണങ്ങൾ, ഫാസ്റ്റ് ഫുഡ്, പഞ്ചസാരയുടെ അമിത ഉപയോഗം എന്നിവ ആർത്തവ ക്രമക്കേടുകളിലേക്ക് നയിക്കാം.
- ഗർഭാശയത്തിലെ സിസ്റ്റുകൾ: ഡെർമോയിഡ് സിസ്റ്റുകൾ പോലുള്ള അവസ്ഥകൾ ആർത്തവചക്രത്തെ ബാധിച്ചേക്കാം.
- ഗർഭധാരണത്തിന് ശേഷം: ഗർഭഛിദ്രം അല്ലെങ്കിൽ പ്രസവം എന്നിവയ്ക്ക് ശേഷം ആർത്തവത്തിൽ ക്രമക്കേടുകൾ ഉണ്ടാകുന്നത് സാധാരണമാണ്.
ആരോഗ്യകരമായ പ്രത്യുത്പാദന വ്യവസ്ഥയ്ക്ക് സമീകൃതാഹാരം, ആവശ്യത്തിന് ഉറക്കം, വ്യായാമം എന്നിവ അത്യാവശ്യമാണ്. ആർത്തവം തുടർച്ചയായി ക്രമം തെറ്റുകയോ മറ്റ് ബുദ്ധിമുട്ടുകൾ അനുഭവപ്പെടുകയോ ചെയ്താൽ ഒരു ഗൈനക്കോളജിസ്റ്റിനെ സമീപിച്ച് ഉപദേശം തേടേണ്ടത് പ്രധാനമാണ്.