ന്യൂഡൽഹി: ‘ഓപ്പറേഷൻ സിന്ദൂറി’ന്റെ ഭാഗമായി ഇന്ത്യ പാകിസ്താന് ശക്തമായ തിരിച്ചടി നൽകിയതിന് പിന്നാലെയുണ്ടായ വെടിനിർത്തലിൽ ഒരു മൂന്നാം കക്ഷിക്കും പങ്കില്ലെന്ന് വിദേശകാര്യ മന്ത്രി എസ്. ജയശങ്കർ രാജ്യസഭയിൽ വ്യക്തമാക്കി. വെടിനിർത്തൽ ഏതെങ്കിലും രാജ്യവുമായുള്ള വ്യാപാര ഭീഷണിയുടെ ഫലമായിരുന്നില്ലെന്നും അദ്ദേഹം പറഞ്ഞു.
യുഎസ് വൈസ് പ്രസിഡന്റിന്റെ മുന്നറിയിപ്പിനെ തുടർന്ന് പാകിസ്താൻ ആക്രമണം നടത്തിയപ്പോൾ, ഇന്ത്യ അവരുടെ വ്യോമ പ്രതിരോധ സംവിധാനങ്ങൾ തകർത്തുകൊണ്ട് ശക്തമായി തിരിച്ചടിച്ചു. ഇതിന് പിന്നാലെ, യുദ്ധം നിർത്താൻ പാകിസ്താൻ ആഗ്രഹിക്കുന്നുവെന്ന് സൂചിപ്പിച്ച് വിവിധ രാജ്യങ്ങളിൽ നിന്ന് ഇന്ത്യക്ക് ഫോൺ കോളുകൾ വരാൻ തുടങ്ങിയെന്ന് ജയശങ്കർ പറഞ്ഞു. എന്നാൽ വെടിനിർത്തലിനായി ഇന്ത്യ മധ്യസ്ഥത സ്വീകരിക്കില്ലെന്നും, അങ്ങനെയൊരു അഭ്യർത്ഥനയുണ്ടെങ്കിൽ അത് ഔദ്യോഗിക സൈനിക മാർഗത്തിലൂടെ (ഡിജിഎംഒ വഴി) വരണമെന്നും ഇന്ത്യ കർശന നിലപാടെടുത്തു. ഒടുവിൽ പാകിസ്താന്റെ ഡിജിഎംഒ അഭ്യർത്ഥിച്ചതിനെ തുടർന്നാണ് വെടിനിർത്തൽ സംഭവിച്ചതെന്നും അദ്ദേഹം വിശദീകരിച്ചു.
വെടിനിർത്തലിൽ മുൻ യുഎസ് പ്രസിഡന്റ് ഡൊണാൾഡ് ട്രംപ് മധ്യസ്ഥത വഹിച്ചെന്ന രാഹുൽ ഗാന്ധിയുടെ വാദത്തെ അദ്ദേഹം തള്ളി. നിർദ്ദിഷ്ട കാലയളവിൽ പ്രധാനമന്ത്രി മോദിയും ട്രംപും തമ്മിൽ ഒരു ഫോൺ സംഭാഷണം പോലും നടന്നിട്ടില്ലെന്ന് അദ്ദേഹം വ്യക്തമാക്കി.
“രക്തവും വെള്ളവും ഒരുമിച്ച് ഒഴുകില്ല” എന്ന് പറഞ്ഞുകൊണ്ട് സിന്ധു നദീജല കരാർ റദ്ദാക്കിയതിനെയും ജയശങ്കർ ന്യായീകരിച്ചു. അതിർത്തി കടന്നുള്ള ഭീകരവാദം ഇന്ത്യ വെച്ചുപൊറുപ്പിക്കില്ലെന്നും, ഭീകരവാദത്തെ ആഗോള അജണ്ടയാക്കാൻ മോദി സർക്കാരിന് കഴിഞ്ഞെന്നും അദ്ദേഹം കൂട്ടിച്ചേർത്തു.