യുഎസ് പടിഞ്ഞാറൻ തീരത്തും ഹവായിലും സുനാമി മുന്നറിയിപ്പ് പ്രഖ്യാപിച്ചതിനെ തുടർന്ന് സാൻ ഫ്രാൻസിസ്കോയിലെ ഇന്ത്യൻ കോൺസുലേറ്റ് അവിടങ്ങളിലുള്ള ഇന്ത്യൻ പൗരന്മാർക്ക് ജാഗ്രതാ നിർദ്ദേശം നൽകി. റഷ്യയിലെ കംചത്ക ഉപദ്വീപിന് സമീപം റിക്ടർ സ്കെയിലിൽ 8.7 തീവ്രത രേഖപ്പെടുത്തിയ ശക്തമായ ഭൂചലനത്തെ തുടർന്നാണ് ഈ മുന്നറിയിപ്പ്.
ഇന്ത്യൻ പൗരന്മാർ അതീവ ജാഗ്രത പാലിക്കണമെന്നും പ്രാദേശിക അധികാരികൾ നൽകുന്ന സുരക്ഷാ നിർദ്ദേശങ്ങൾ കർശനമായി പാലിക്കണമെന്നും കോൺസുലേറ്റ് പുറത്തിറക്കിയ അറിയിപ്പിൽ പറയുന്നു. സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും അധികൃതർ അറിയിച്ചു.
പ്രധാന നിർദ്ദേശങ്ങൾ:
- പ്രാദേശിക അടിയന്തര ഏജൻസികളിൽ നിന്നും യുഎസ് സുനാമി മുന്നറിയിപ്പ് കേന്ദ്രങ്ങളിൽ നിന്നുമുള്ള അറിയിപ്പുകൾ ശ്രദ്ധിക്കുക.
- സുനാമി മുന്നറിയിപ്പ് ലഭിച്ചാൽ ഉടൻതന്നെ ഉയർന്ന പ്രദേശങ്ങളിലേക്ക് മാറുക.
- തീരപ്രദേശങ്ങളിൽ നിന്ന് വിട്ടുനിൽക്കുക.
- അടിയന്തര സാഹചര്യങ്ങളെ നേരിടാൻ തയ്യാറായിരിക്കുക, മൊബൈൽ ഫോൺ പോലുള്ള ഉപകരണങ്ങൾ പൂർണ്ണമായി ചാർജ്ജ് ചെയ്തു വെക്കുക.
റഷ്യയുടെ കിഴക്കൻ തീരത്തുണ്ടായ ഭൂചലനത്തെ തുടർന്ന് യുഎസ് വെസ്റ്റ് കോസ്റ്റ്, അലാസ്ക, ഹവായ് എന്നിവിടങ്ങളിൽ സുനാമി മുന്നറിയിപ്പ് നൽകിയിട്ടുണ്ട്. അതേസമയം, ഈ ഭൂചലനം ഇന്ത്യൻ തീരപ്രദേശങ്ങൾക്ക് ഭീഷണിയില്ലെന്ന് ഇന്ത്യൻ നാഷണൽ സെന്റർ ഫോർ ഓഷ്യൻ ഇൻഫർമേഷൻ സർവീസസ് (INCOIS) വ്യക്തമാക്കിയിട്ടുണ്ട്.