കോവിഡ്-19 മഹാമാരിയും അതിനോടനുബന്ധിച്ചുള്ള ലോക്ക്ഡൗൺ കാലഘട്ടവും മനുഷ്യന്റെ തലച്ചോറിന് കൂടുതൽ വേഗത്തിൽ പ്രായം കൂട്ടിയിരിക്കാമെന്ന് പുതിയ പഠനങ്ങൾ വെളിപ്പെടുത്തുന്നു. വൈറസ് ബാധിച്ചില്ലെങ്കിൽ പോലും, മഹാമാരിയുടെ അനുഭവങ്ങൾ തലച്ചോറിനെ ഏകദേശം 5.5 മാസം വേഗത്തിൽ വാർദ്ധക്യത്തിലേക്ക് നയിച്ചുവെന്ന് നേച്ചർ മാഗസിനിൽ പ്രസിദ്ധീകരിച്ച പഠനം പറയുന്നു.
പുരുഷന്മാരിലും പ്രായമായവരിലും ആരോഗ്യപരമായ പ്രശ്നങ്ങളുള്ളവരിലും വിദ്യാഭ്യാസ നിലവാരം കുറഞ്ഞവരിലും വരുമാനം കുറഞ്ഞവരിലുമാണ് ഈ സ്വാധീനം കൂടുതൽ പ്രകടമായതെന്ന് പഠനം ചൂണ്ടിക്കാട്ടുന്നു. യുകെ ബയോബാങ്ക് (UKBB) പഠനത്തിൽ നിന്നുള്ള ന്യൂറോ-ഇമേജിംഗ് ഡാറ്റ ഉപയോഗിച്ചാണ് ഗവേഷകർ ഈ നിഗമനത്തിലെത്തിയത്. മഹാമാരിക്ക് മുൻപും ശേഷവുമുള്ള തലച്ചോറിന്റെ സ്കാനുകൾ താരതമ്യം ചെയ്തായിരുന്നു പഠനം നടത്തിയത്.
വൈറസ് നേരിട്ട് ബാധിച്ചതിനേക്കാൾ ലോക്ക്ഡൗണിന്റെ സമ്മർദ്ദം, ഒറ്റപ്പെടൽ, നഷ്ടബോധം, അരക്ഷിതാവസ്ഥ തുടങ്ങിയ മാനസികാവസ്ഥകളാണ് തലച്ചോറിന്റെ ആരോഗ്യത്തെ ഗണ്യമായി ബാധിച്ചതെന്നും പഠനം എടുത്തുപറയുന്നു. ഈ കണ്ടെത്തലുകൾ കോവിഡ് കാലഘട്ടത്തിലെ മാനസികാരോഗ്യ വെല്ലുവിളികളുടെ വ്യാപ്തി അടിവരയിടുന്നു.