മുംബൈ: ഗണേശ ചതുർഥി പ്രമാണിച്ച് ഇന്ത്യൻ ഓഹരി വിപണിക്ക് ഇന്ന് (ഓഗസ്റ്റ് 27) അവധി. ബോംബെ സ്റ്റോക്ക് എക്സ്ചേഞ്ച് (ബിഎസ്ഇ), നാഷണൽ സ്റ്റോക്ക് എക്സ്ചേഞ്ച് (എൻഎസ്ഇ) എന്നിവ ഇന്ന് പ്രവർത്തിക്കില്ല. കമ്മോഡിറ്റി, ഫോറെക്സ് വിപണികൾക്കും അവധിയാണ്.
യുഎസ് പ്രസിഡന്റ് ഡൊണാൾഡ് ട്രംപ് ഇന്ത്യയ്ക്കെതിരെ പ്രഖ്യാപിച്ച 50% ഇറക്കുമതി തീരുവ പ്രാബല്യത്തിൽ വരുന്നതിന്റെ ആശങ്കയിൽ ഇന്നലെ വിപണിയിൽ കനത്ത നഷ്ടം രേഖപ്പെടുത്തിയിരുന്നു. ഈ സാഹചര്യത്തിൽ ഇന്നത്തെ അവധി നിക്ഷേപകർക്ക് ഒരു താത്ക്കാലിക ആശ്വാസമായി. ഇന്നലെ വ്യാപാരം അവസാനിച്ചപ്പോൾ സെൻസെക്സ് 849 പോയിന്റ് (1.04%) ഇടിഞ്ഞ് 80,786 ലും നിഫ്റ്റി 255 പോയിന്റ് (1.02%) താഴ്ന്ന് 24,712 ലും എത്തിയിരുന്നു.
എഫ്എംസിജി ഒഴികെയുള്ള മിക്കവാറും എല്ലാ മേഖലകളും നഷ്ടത്തിലാണ് ഇന്നലെ വ്യാപാരം അവസാനിപ്പിച്ചത്. ശ്രീറാം ഫിനാൻസ്, സൺ ഫാർമ, ടാറ്റ സ്റ്റീൽ തുടങ്ങിയ ഓഹരികൾക്ക് കനത്ത നഷ്ടം നേരിട്ടപ്പോൾ മാരുതി സുസുക്കി, ഹിന്ദുസ്ഥാൻ യൂണിലിവർ തുടങ്ങിയ ഓഹരികൾ നേരിയ നേട്ടമുണ്ടാക്കി.
ഈ വർഷം ഇനി 5 അവധി ദിനങ്ങൾ കൂടി
ഈ വർഷം ഇനി അഞ്ച് അവധി ദിനങ്ങൾ കൂടിയാണ് ഓഹരി വിപണിക്ക് ബാക്കിയുള്ളത്.
- ഒക്ടോബർ 2: ഗാന്ധി ജയന്തി, ദസറ
- ഒക്ടോബർ 21: ദീപാവലി (ലക്ഷ്മി പൂജ)
- ഒക്ടോബർ 22: ദീപാവലി ബലിപ്രതിപദ
- നവംബർ 5: ഗുരുനാനാക്ക് ജയന്തി
- ഡിസംബർ 25: ക്രിസ്മസ്
ഒക്ടോബർ 21-ന് ദീപാവലി പ്രമാണിച്ചുള്ള പ്രധാന അവധി ദിനമാണെങ്കിലും, അന്ന് വൈകുന്നേരം ഒരു മണിക്കൂർ നേരത്തേക്ക് പ്രത്യേക ‘മുഹൂർത്ത വ്യാപാരം’ നടക്കും. ഹിന്ദു സംവത് വർഷാരംഭത്തിന്റെ ഭാഗമായുള്ള ഈ മുഹൂർത്ത വ്യാപാരം നിക്ഷേപം നടത്താൻ ഐശ്വര്യപ്രദമായാണ് കണക്കാക്കപ്പെടുന്നത്. ഇതിന്റെ സമയം എക്സ്ചേഞ്ചുകൾ പിന്നീട് അറിയിക്കും.