യുഎഇയിലെ വിദ്യാർത്ഥികൾക്ക് പഠനത്തോടൊപ്പം ആഘോഷിക്കാനും വിശ്രമിക്കാനും ധാരാളം അവസരങ്ങളൊരുക്കി പുതിയ അധ്യയന വർഷത്തെ കലണ്ടർ പുറത്തിറക്കി. വിദ്യാഭ്യാസ മന്ത്രാലയം പ്രഖ്യാപിച്ച പുതിയ കലണ്ടർ പ്രകാരം, ഈ വർഷം വിദ്യാർത്ഥികൾക്ക് ആകെ 135 അവധി ദിനങ്ങൾ ലഭിക്കും. 313 ദിവസം നീണ്ടുനിൽക്കുന്ന അധ്യയന വർഷത്തിൽ വെറും 178 ദിവസം മാത്രമായിരിക്കും ക്ലാസുകൾ ഉണ്ടാകുക. അതായത്, അധ്യയന വർഷത്തിന്റെ 43 ശതമാനവും അവധിയായിരിക്കും.
പ്രധാന അവധി ദിനങ്ങൾ ഇങ്ങനെ:
- വിന്റർ ബ്രേക്ക്: ഡിസംബർ 8 മുതൽ നാലാഴ്ചത്തേക്ക്. ജനുവരി 5-ന് ക്ലാസുകൾ പുനരാരംഭിക്കും.
- സ്പ്രിംഗ് ബ്രേക്ക്: മാർച്ച് 15 മുതൽ 29 വരെ.
ഈ പ്രധാന അവധികൾക്ക് പുറമെ, കുട്ടികളുടെ പഠന സമ്മർദ്ദം കുറയ്ക്കുന്നതിനായി ടേം ബ്രേക്കുകളും നൽകിയിട്ടുണ്ട്. സർക്കാർ കരിക്കുലം പിന്തുടരുന്ന സ്കൂളുകൾക്ക് ഓഗസ്റ്റ്, ഫെബ്രുവരി, മെയ് മാസങ്ങളിലും മിഡ്-ടേം ബ്രേക്കുകൾ ഉണ്ടാകും. സ്വകാര്യ സ്കൂളുകൾക്ക് ഒക്ടോബറിലും ഫെബ്രുവരിയിലുമായി അഞ്ച് ദിവസം വീതം ബ്രേക്ക് നൽകാനും നിർദ്ദേശമുണ്ട്.
പുതിയ അധ്യയന വർഷം ഓഗസ്റ്റ് 25-ന് ആരംഭിച്ച് അടുത്ത വർഷം ജൂലൈ 3-ന് അവസാനിക്കും (ഷാർജ ഒഴികെ).
കുട്ടികളെ ക്ലാസ് മുറികളിൽ മാത്രം തളച്ചിടാതെ, അവരുടെ മാനസികാരോഗ്യത്തിനും സാമൂഹികമായ വളർച്ചയ്ക്കും പ്രാധാന്യം നൽകുന്നതാണ് പുതിയ വിദ്യാഭ്യാസ നയമെന്ന് യുഎഇ വിദ്യാഭ്യാസ മന്ത്രാലയം വ്യക്തമാക്കി. പഠനത്തോടൊപ്പം കുടുംബത്തോടും സമൂഹത്തോടും ഇടപഴകി വളരാനുള്ള അവസരം കുട്ടികൾക്ക് നൽകുക എന്നതാണ് ഈ മാറ്റത്തിലൂടെ ലക്ഷ്യമിടുന്നത്.