പ്രശസ്ത ഗുസ്തി താരവും ലോകമെമ്പാടും ആരാധകരുള്ള ഹൾക്ക് ഹോഗൻ 71-ാം വയസ്സിൽ അന്തരിച്ചതായി വേൾഡ് റെസ്ലിംഗ് എന്റർടെയിൻമെന്റ് (WWE) സ്ഥിരീകരിച്ചു. വ്യാഴാഴ്ച എക്സ് പ്ലാറ്റ്ഫോമിലൂടെയാണ് (മുൻപ് ട്വിറ്റർ) WWE ഈ വാർത്ത പുറത്തുവിട്ടത്.
“WWE ഹാൾ ഓഫ് ഫെയിം അംഗം ഹൾക്ക് ഹോഗൻ അന്തരിച്ചുവെന്ന വാർത്ത ദുഃഖത്തോടെയാണ് ഞങ്ങൾ കേൾക്കുന്നത്. 1980-കളിൽ WWE-ക്ക് ആഗോള പ്രശസ്തി നേടുന്നതിൽ നിർണായക പങ്ക് വഹിച്ച, പോപ്പ് സംസ്കാരത്തിലെ ഏറ്റവും പ്രശസ്തനായ വ്യക്തിത്വങ്ങളിൽ ഒരാളായിരുന്നു അദ്ദേഹം. ഹോഗന്റെ കുടുംബത്തിന്റെയും സുഹൃത്തുക്കളുടെയും ആരാധകരുടെയും ദുഃഖത്തിൽ WWE പങ്കുചേരുന്നു,” പ്രസ്താവനയിൽ പറയുന്നു.
ടിഎംസി സ്പോർട്സ് (TMZ Sports) റിപ്പോർട്ട് അനുസരിച്ച്, ഹൃദയാഘാതത്തെ തുടർന്ന് വ്യാഴാഴ്ച പുലർച്ചെ ഫ്ലോറിഡയിലെ ഹോഗന്റെ വസതിയിലേക്ക് ആംബുലൻസ് എത്തിയിരുന്നു. അദ്ദേഹത്തെ സ്ട്രെച്ചറിൽ ആംബുലൻസിലേക്ക് മാറ്റുന്നത് കണ്ടതായി അടുത്ത വൃത്തങ്ങൾ അറിയിച്ചു.
മരണത്തിന് ഏതാനും ആഴ്ചകൾക്ക് മുൻപ് ഹോഗൻ ഹൃദയസംബന്ധമായ ഒരു വലിയ ശസ്ത്രക്രിയയ്ക്ക് വിധേയനായിരുന്നു. അദ്ദേഹം സുഖം പ്രാപിച്ചുവരികയായിരുന്നുവെന്നും ആരോഗ്യനിലയിൽ ആശങ്കപ്പെടാനില്ലെന്നും അദ്ദേഹത്തോട് അടുത്ത വൃത്തങ്ങൾ അറിയിച്ചിരുന്നു. ഔദ്യോഗിക മരണകാരണം ഇതുവരെ പുറത്തുവിട്ടിട്ടില്ല, കുടുംബാംഗങ്ങൾ ഇതുവരെ പ്രതികരിച്ചിട്ടില്ല.
ടെറി ബൊളിയ എന്ന യഥാർത്ഥ പേരുള്ള ഹൾക്ക് ഹോഗൻ, 1980-കളിലും 90-കളിലും റെസ്ലിംഗ് ലോകത്തെ ഏറ്റവും വലിയ താരമായിരുന്നു. തന്റെ കരിയറിൽ നിരവധി ലോക ചാമ്പ്യൻഷിപ്പുകൾ നേടുകയും ലോകമെമ്പാടും WWE-യെ ജനകീയമാക്കുന്നതിൽ പ്രധാന പങ്ക് വഹിക്കുകയും ചെയ്തു.